Frisbígolffélag Reykjavíkur (FGR) stendur fyrir hinu árlega Opna Reykjavíkurmóti í folfi sem fram fram á Grafarholtsvelli um hvítasunnuhelgina, 18.-20. maí.
Mótið er alþjóðlegt stórmót og eru alls 130 keppendur frá 10 þjóðlöndum skráðir til leiks og er keppendahópurinn samanlagt sá sterkasti sem tekið hefur þátt frá upphafi.
15 hafnfirskir keppendur keppa á mótinu.
Gríðarlegur vöxtur er í folfiðkun hérlendis, bæði sem íþróttagrein og afþreyingu, og aðsókn að frisbígolfvöllum hefur slegið öll met síðastliðin ár. Tugþúsundir Íslendinga stunda frisbígolf sér til skemmtunar og afþreyingar á þeim 90 frisbígolfvöllum sem settir hafa verið upp um land allt.
Mótið stendur frá laugardegi til mánudags og eru keppendur ræstir út í hópum, fjórir í senn, líkt og í golfi. Fyrsti rástími er kl. 8.30 á laugardegi og síðasti hópur verður ræstur út kl. 15.30.
Á sunnudegi og mánudegi er fyrsti hópur ræstur út kl. 8.30 og von er á síðasta ráshóp á 18 körfu um kl. 19.00.
Frisbígolfvöllurinn í Grafarholti byrjar við félagshús FGR að Þorláksgeisla 51 og eru brautir hans samtals um 2 km á lengd.
