Leiguíbúðum á vegum sveitarfélaga fjölgaði um 13,6% í Reykjavík og 10% í Kraganum á árabilinu 2012-2017 en fækkaði annars á landsbyggðinni nema á Norðurlandi eystra, samkvæmt niðurstöðum könnunar Varasjóðs húsnæðismála á stöðu leiguíbúða sem sveitarfélögin reka.
Skýrsla með niðurstöðunum hefur verið birt á vef velferðarráðuneytisins. Svarhlutfall var að þessu sinni mun lægra en áður. Svör bárust frá 44 sveitarfélögum af 74, en í sveitarfélögunum 44 búa tæp 90% landsmanna.
Meðal þess sem fjallað er um í skýrslunni er mat sveitarfélaga á rekstrarvanda vegna leiguíbúða, framboð húsnæðis á leigumarkaði innan hvers þeirra, áform sveitarfélaga um fjölgun eða fækkun íbúða, upplýsingar um fjölda umsókna um félagslegt leiguhúsnæði, biðlista og biðitíma, leigugjald á fermetra, greiðslur sérstaks húsnæðisstuðnings, ástand og viðhald leiguíbúða sveitarfélaganna og fleira.
Könnun Varasjóðs sýnir að við lok ársins 2017 voru leiguíbúðir í eigu þeirra 5.124 talsins. Það er 0,7% fjölgun frá fyrra ári og voru íbúðirnar 35 fleiri en við lok ársins 2016.
Greining á þróuninni á fimm ára tímabili 2012-2017 eftir landshlutum sýnir að fjölgun leiguíbúða sveitarfélaga varð nær eingöngu á höfuðborgarsvæðinu og reyndist hún vera 13,6% í Reykjavík og 10% í Kraganum. Á landsbyggðinni varð alls staðar fækkun nema á Norðurlandi eystra þar sem leiguíbúðum fjölgaði um 5,2%. Mest fækkaði leiguíbúðum á þessu tímabili á Vestfjörðum eða um 26,1%, á Norðurlandi vestra um 12,5%, og 11,3% á Austurlandi.
Skv. skýrslunni voru 244 leiguíbúðir í eigu Hafnarfjarðarbæjar skv. þeim gögnum sem Hafnarfjarðarbær hafði sent inn. Fram hefur komið að þær upplýsingar séu ekki réttar, heldur sé talan 255.
Lesa má skýrsluna hér.
