VSÓ Ráðgjöf ehf. í Reykjavík bauð lægst í for- og verkhönnun göngu- og hjólastíga í Kópavogi, Garðabæ og Hafnarfirði.
Verkið felst í að útfæra aðskildar göngu- og hjólaleiðir vestan Hafnarfjarðarvegar og Fjarðarbrautar, en skv. upplýsingum frá Vegagerðinni miðast framkvæmdir í Hafnarfirði við legginn frá Engidal og að Hraunbrún.
Kaflarnir eru þrír:
- við voginn í Kópavogi (879 m)
- við túnin í Garðabæ (1.056 m)
- við Norðurbæ í Hafnarfirði og við ásahverfi í Garðabæ (1.044 m)
Bauð VSÓ Ráðgjöf ehf. 21,9 millj. kr. eða 84,4% af kostnaðaráætlun, VBV ehf. bauð 38,7 milljónir eða 49,3% yfir kostnaðaráætlun og Hnit verkfræðistofa hf. bauð hæst 39,6 milljónir kr. eða 53% yfir kostnaðaráætlun og 81,2% hærra en VSÓ Ráðgjöf bauð.
Verkefnið er samstarfsverkefni Vegagerðarinnar, Kópavogsbæjar, Garðabæjar og Hafnarfjarðarbæjar og er hluti af framkvæmdaáætlun um hjólastíga.
Lagt er upp með að þar verði aðskilið göngu- og hjólastígakerfi með sérstökum hjólastíg og göngustíg. Stígarnir munu tengjast stígakerfi sem liggur vestan Hafnafjarðarvegar norðan Álftanesvegar. Upphaflega var stefnt að því að hefja framkvæmdir haustið 2022 eða vor 2023 en nú er verið að hefja hönnun.
Framundan
Á næstu árum stendur til að fara í framkvæmdir við gerð stígs meðfram Fjarðarhrauni, frá vegamótum við Hafnarfjarðarveg langleiðina að Hlíðartorgi. Í dag er þar stígur þar sem umferð gangandi og hjólandi er ekki aðgreind og tenging yfir á stíg við Álfaskeið er óviðunandi.
Skv. upplýsingum frá Vegagerðinni er til skoðunar að hefja hönnun á nýju stígakerfi við Álfaskeið, Bæjarhraun, Fjarðarhraun og við Kaplakrika.
Einnig stendur til að fara í uppbyggingu á stígum frá vegamótum Reykjanesbrautar og Fjarðarhrauns, austur Reykjanesbraut að bæjarmörkum Garðabæjar en líklega verður það ekki gert fyrr ákveðið hefur verið hvaða lausn verði valin á leiðinni Lækjargata að nýjum Álftanesvegi, hvort Reykjanesbrautin fari í stokk eða gerð verði jarðgöng undir Setbergshverfið.
Ekki er byrjað að undirbúa þær framkvæmdir en á áætlun en frumdrög áttu nú þegar að vera tilbúin og hönnunarvinna átti að fara fram 2023 – 2025.
Framkvæmdaáætlun um hjólastíga
Á höfuðborgarsvæðinu hafa verið skilgreindar sérstakar stofnhjólaleiðir sem ná yfir stóran hluta þess. Uppbygging þeirra heyrir að miklu leyti undir Samgöngusáttmálann sem gerður var milli ríkis og sveitarfélaganna árið 2019. Útfærsla stofnhjólaleiðanna var unnin af vinnuhópi á vegum Vegagerðarinnar og sveitarfélaganna sex á höfuðborgarsvæðinu og var litið sérstaklega til samgönguhjólreiða við skipulagningu þeirra.
Við undirbúning stofnhjólaleiðanna var umferð talin til að meta hvar mesta þörfin væri á að aðskilja hjólandi og gangandi vegfarendur og unnið út frá þeim. Í kjölfarið voru umferðarmestu staðirnir settir í forgang og einnig horft til þess hvar Borgarlínan kemur til með að vera en gert er ráð fyrir að meðfram henni verði góðar göngu- og hjólaleiðir.
Endurbótum lokið á Strandgötu/Fjarðarbraut
Þegar er framkvæmdum lokið við að bæta hjólaleið á milli miðbæjarins og Vallahverfisins en þegar Reykjanesbraut var breikkuð var tækifærið notað og undirgöngin breikkuð svo þar væri rými fyrir hjóla- og gönguleið.
Nýir aðskildir stígar voru gerðir, bæði austan og vestan megin við Strandgötuna. Nær sá stígur nú að Flensborgartorgi og því enn eftir að bæta stíga þaðan og að Strandstígnum norðan við gamla Drafnarslippinn.
Hvað er Fjarðarbraut?
Það vekur athygli að Vegagerðin talar um Fjarðarbraut (hluti af vegi 470) og við nánari skoðun kemur í ljós að það er vegur sem í Hafnarfirði er merktur sem Strandgata og nær frá Ástorgi við Ástjörn og að Óseyrarbraut!
Við nánari skoðun kemur fram að Hafnarfjarðarvegur nær ekki aðeins á milli Reykjavíkur og Engidals skv. upplýsingum Vegagerðarinnar heldur telst Fjarðarhraun, sem liggur frá Engidal að Reykjanesbraut, einnig hluti af Hafnarfjarðarvegi. Listi yfir vegi má finna hér.
Einhver hefði spurt: „Veit Rósa af þessu?
