Gerð Ásvallabrautar hefur verið töluvert á milli tannanna hjá mörgum bæjarbúum. Þó tengir hún saman fjarlæg hverfi og kemur til með að tengja framtíðarbyggingarsvæði sem er í framhaldi af Áslandi 3, eins og kemur fram á aðalskipulagi.
Það hafa helst verið hestamenn og íbúar í neðstu götum í Áslandi 3 sem mótmælt hafa brautinni. Íbúar í Áslandi vegna þess að hún væri svo nálægt húsum þeirra en samt hefur hún verið færð fjær húsunum en brautin var skv. því deiliskipulagi sem var í gangi þegar hverfið var byggt.
Upphaflega átti þarna einnig að vera ofanbyggðavegur sem tengdist inn á Flóttamannaveginn/Elliðavatnsveginn en litlar líkur eru á að af honum verði þó gert sé ráð fyrir honum í aðalskipulagi Hafnarfjarðar.
Verkið var boðið út í vor og átti Snókur ehf. lægsta tilboð, um 704 millj. kr. og fellur allur kostnaður af gatnagerðinni á Hafnarfjarðarbæ.
Eins og á þeim hluta vegarins sem liggur að byggingum á Völlum og í Skarðshlíð verður 50 km hámarkshraði á veginum en eins og áður segir er gert ráð fyrir að honum tengist vegir að framtíðarbyggingarsvæði í nágrenninu.
Verklok eru áætlaðar 1. október 2021 eða eftir rétt rúmt eitt ár.
Sjá nánar um framkvæmdina á upplýsingasíðu um Ásvallabraut.
