Einingaverksmiðjunnar ehf. sem hefur flutt starfsemi sína í Hafnarfjörð og fagnaði 30 ára afmæli fyrirtækisins um leið og opnun verksmiðjunnar við Koparhellu.
Í upphafi framleiddi fyrirtækið aðallega rifjaplötur til nota í þök stærri bygginga og ýmsa bita en síðan þá hefur framleiðslan þróast gífurlega. Í dag er framleiðslan mjög fjölbreytt upp í forsteyptar einangraðar veggjaeiningar fyrir íbúðar- og iðnaðarhús. Má þar nefna forsteyptar svalir, loftaplötur, stiga, bita ýmisskonar og svo sérlausnir eins og kereiningar fyrir landeldi en fyrirtækið er það eina á landinu sem framleiðir slíkar einingar. Aðspurð segir hún mest framleitt af holplötum, sem séu í raun stöðugt í framleiðslu.
Segir Guðbjörg að eftirspurnin hafi aukist mikið á undanförnum árum. Hún segir þó að Íslendingar byggi ekki mjög stöðluð hús og því þarf að aðlaga einingar töluvert eftir óskum viðskiptavina og hönnuða.
Guðbjörg segir það miklu umhverfisvænna, skilvirkara og fljótlegra að setja upp einingahús. „Íslendingar eru mjög eftir á miðað við það sem er að gerast í löndunum í kringum okkur og ég held að ein ástæðan sé að við höfum ekki verið með verksmiðju sem hefur haft nægilega mikla afkastagetu. Byggingargeirinn á svo mikið inni, komandi úr Össur með mikla skilvirkni og í byggingargeirann þar sem oft er viðmiðið að þetta reddast,“ segir Guðbjörg og brosir.
Sagði hún að það vantaði enn reynslu hjá hönnuðum og sýndi blaðamanni danska bók með glæsilegum verkum þar sem notast var við forsteyptar einingar.
Nýsköpun ber oft á góma í samtali við Guðbjörgu sem segir mikilvægt að horfa fram á við og þróa vörurnar áfram. M.a. bendir hún á að hægt er að gera alls kyns mynstur í steypuna með því að leggja á steypuborðið pappa sem í er efni sem kemur í veg fyrir að ysta lagið í steypunni harðni en það er svo þvegið burt. Þetta segir Guðbjörg gefi mjög mikla möguleika í útlitshönnun.
Stefnuhús er nafn á stefnumörkun fyrirtækisins sem Guðbjörg segir mjög mikilvægt að sinna vel enda ekki vanþörf á þegar framleiðslueiningarnar eru svo fjölbreyttar. Skv. henni ætlar fyrirtækið m.a. að verða leiðandi á sínu sviði og eftirsóttur vinnustaður í Hafnarfirði.
Vann hjá Helga í Góu
„Ég er Hafnfirðingur og ólst upp í Hafnarfirði og vann hjá Helga í Góu í tíu ár. Ég flyt svo í Mosfellsbæ þegar ég opna Kentucky í Mosfellsbæ. Eftir að hafa rekið hann í smá tíma skelli ég mér í skóla og klára verkfræðina þegar ég var orðin 25 ára. Ég ætlaði aldrei í skóla, fannst það algjör vitleysa. En ég kláraði rekstrarverkfræði í HR og iðnaðarverkfræði í HÍ og gerði svo meistararitgerðina fyrir Össur þar sem ég var í sjö ár og gegndi ýmsum störfum. Þaðan fór ég til Veitna og var þar forstöðumaður fráveitu. Í mars 2022 er ég beðinn að taka að mér að leiða Einingaverksmiðjuna. Þá var fyrirtækið uppi á Höfða en ákvörðun hafði verið tekin um að flytja í Hafnarfjörð svo fyrsta verkefnið var að flytja fyrirtækið í heimabæinn,“ segir Guðbjörg sem fékk ærið verkefni að undirbúa flutninginn.
Hvernig Hafnfirðingur ertu?
„Ég ólst upp í Hvömmunum, fór í Öldutúnsskóla og fór snemma að vinna. Foreldrar mínir eru Ólöf Unnur Einarsdóttir og Guðmundur Friðrik Óskarsson, leigubílstjóri á G-470“. Móðurforeldrar hennar voru Einar Pétursson, brunavörður og Guðbjörg Sæunn Júlíusdóttir sem Guðbjörg segir að hafi verið fyrsta konan sem keyrði mjólkurbíl. Föðurforeldrar hennar voru Óskar Hafnfjörð Auðunsson, Haffi ökukennari og Sólborg Guðmundsdóttir sem vann lengst sem matráðskona í Rafha.
30 ára afmæli
Fjölmennt var í 30 ára afmæli og opnunarhófinu þar sem fjölmargir þeir sem vinna með einingarnar fengu að skoða nýju verksmiðjuna en sumir höfðu jafnvel aldrei séð hvernig einingarnar voru framleiddar.
Nánar um Einingaverksmiðjuna
Einingaverksmiðjan hóf starfsemi sína í febrúar árið 1994 þegar fyrirtækin ÓS húseiningar og Byggingariðjan sameinuðu krafta sína undir einu nafni.
Fyrstu fimm árin störfuðu aðeins um tíu manns í framleiðslu hjá Einingaverksmiðjunni og má segja að róðurinn hafi oft á tíðum verið þungur.
Stór verkefni hefjast og starfsmönnum fjölgar
Veggjaframleiðsla fór að aukast og árið 1995 var svo komið að hús sem steypt voru af Einingaverksmiðjunni voru send með skipsförmum til Þýskalands.
Fyrsta stóra verkefnið var stækkun álversins í Straumsvík árið 1996 og í tengslum við það fjölgaði starfsmönnum upp í ríflega þrjátíu manns.
Ný stúka við Laugardalsvöll var einnig steypt hjá fyrirtækinu á þessum árum sem hefur þjónað landsmönnum vel á landsleikjum frá árinu 1998 þegar hún var vígð.
1000 einingar fyrir fráveitulögn og mikill uppgangur
Ekki skorti fjölbreytni í framleiðslunni en á þessum árum tók Einingaverksmiðjan að sér að steypa 1000 einingar fyrir fráveitulögn og vóg hver eining um 6 tonn.
Upp úr aldamótum var vöruúrval Einingaverksmiðjunnar orðið mun meira og mikil aukning framleiðslu á holplötum og forsteyptum svölum svo dæmi sé tekið.
Framleiðsla einskoraðist ekki við íslenska viðskiptavini því mikið var selt til Færeyja og Grænlands.
Þegar leið á áratuginn jókst eftirspurnin jafnt og þétt og um tíma var álagið svo mikið að félagið annaði ekki eftirspurn.
Breyttar aðstæður
Bankahrunið skall á með miklum þunga árið 2008. Fyrirtækið lifði af með mikla útsjónarsemi í rekstrinum og þá forsjá sem fólst í því að sótt hafi verið á erlenda markaði áður en efnahagskreppan reið yfir Ísland og hafði mikil áhrif á byggingarmarkaðinn.
Mikil vöruþróun og starfsemin vex
Vöruþróun og nýsköpun hefur aukist mikið á síðustu árum og aukin áhersla og geta til að mæta fjölbreyttum þörfum og óskum viðskiptavina.
Starfsemi Einingaverksmiðjunnar hefur vaxið mikið á síðasta áratug og í dag starfa um 80 manns.
Flutningar í nýja verksmiðju og spennandi tímar framundan
Framleiðslan hefst um áramótin 2023 í nýrri hátækni verksmiðju við Koparhellu 5 í Hafnarfirði. Verksmiðjan er sex þús. fermetrar að stærð og inniheldur 25 framleiðslubekki sem eru allt að 90 metra langir.
Framleiðslugeta er nú yfir 1000 fermetrar á dag og gerir því ný verksmiðjan Einingaverksmiðjunni kleift að vaxa enn frekar og framleiða hágæða vörur á fjölbreyttan máta.
Greinin var fyrst birt í 4. tbl. Fjarðarfrétta, 11. apríl 2024
Frítt Fjarðarfrétta-app í símann þinn!
Hægt er að sækja app í þinn síma í Play Store í Android símum og í Apps store í iOS símum. Frítt er að sækja appið og lesa Fjarðarfréttir!
