Verslunin ICE Design by Thora H, sem staðsett er á fyrstu hæð í verslunarmiðstöðinni Firði, fagnaði 13 ára afmæli sínu á dögunum en stofnandinn og eigandinn er Hafnfirðingurinn Þóra Hvanndal skartgripahönnuður.
Þóra er blómaskreytir að upplagi en hafði mikinn áhuga á skartgripagerð og fór í grunnnám í gullsmíði en hefur annars verið sjálfmenntuð auk þess að hafa sótt fjölda námskeiða. Hún hefur dvalið mikið erlendis þegar hún starfaði í flugþjónustu og bjó meðal annars í 18 ár í Danmörku þar sem hún hóf eigin framleiðslu á skartgripum. Nær allt sem hún gerir er úr silfri og með fiskroði og hafa verk henna notið mikilla vinsælda.
Fyrstu skartgripirnir voru skartgripir úr silfri með slípuðu sjávargrjóti í og var útlitið eins og Ísland. Hefur hún síðan gert ýmsar útfærslur af þeim og síðar hóf hún þróun á skartgripum úr silfri og fiskroði sem Þóra segir að hafi fengið geysilega góðar viðtökur.
Eftirsókn eftir skartgripum fyrir karlmenn eykst
Þóra segist í upphafi hafa hannað og smíðað skartgripi fyrir karlmenn en lítil eftirspurn hafi verið. Á síðasta ári hannaði hún t.d. einfalda skyrtuhnappa með fiskroði og bindisnælur og segir hún að allt hafi selst upp á stuttum tíma.
Þóra hannar og smíðar alla sína gripi sjálf en segir að hún hafi verið í fullri annarri vinnu þar til 2020 þegar hún helgaði sig alfarið skartgripagerðinni.
Þóra selur skartgripi sína í Firði og m.a. á tveimur stöðum í Danmörku.
Sjá nánar á Facebooksíðu ICE Design by Thora H
