Hafnarfjarðarbær og Icelandair Group undirrituðu í gær viljayfirlýsingu um að Icelandair stefni að framtíðaruppbyggingu á höfuðstöðvum Icelandair að Flugvöllum 1.
Icelandair Group skrifaði 30. desember sl. undir samning við fasteignafélagið Reiti um sölu á skrifstofuhúsnæði félagsins að Nauhólsvegi 50 við Reykjavíkurflugvöll. Kom þá fram að Icelandair muni þó leigja húsnæðið af Reitum undir núverandi starfsemi til þriggja ára eða til loka árs 2023. Þá lá ljóst fyrir að framtíðaruppbyggingin yrði í Hafnarfirði, þar sem fyrirtækið er með þjálfunarsetur og miðstöð flugáhafna. Staðsetningin er mun hagstæðari en við Reykjavíkurflugvöll enda nær Keflavíkurflugvelli. Á koma Icelandair í Hafnarfjarðar átt sér mjög langa sögu eða allt frá því skipulag var gert um þetta svæði við Reykjanesbrautina.
„Það er spennandi að hefja uppbyggingu á nýjum höfuðstöðvum á Flugvöllum í Hafnarfirði þar sem við höfum tækifæri til að sameina starfsstöðvar okkar á höfuðborgarsvæðinu á einum stað og erum jafnframt nær Keflavíkurflugvelli. Hönnun og skipulag nýrra höfuðstöðva mun taka mið af þörfum starfsemi félagsins nú og til framtíðar og mun reynsla okkar af sveigjanlegu vinnufyrirkomulagi undanfarna mánuði án efa nýtast okkur vel í þeirri vinnu sem starfsfólk alls staðar að úr fyrirtækinu mun taka þátt í,“ segir Bogi Nils Bogason forstjóri Icelandair.
Lóð stækkuð til austurs og vestur
Núverandi lóð Icelandair að Flugvöllum 1 er 42.979,8 fermetrar og hljóðar lóðarleigusamningur upp á leigu til 25 ára frá 1. maí 2014. Ráðgerð er stækkun lóðar til vesturs um allt að 6.000 fermetra og til austurs um allt að 6.500 fermetra. Heimilt byggingarmagn lóðar er 21.489,9 fermetrar og nýtingarhlutfallið 0,5. Um greiðslu gatnagerðargjalda fer eftir samningi aðila frá 26. maí 2014 vegna uppbyggingar á Flugvöllum 1. Lóðarleigusamningur verður endurnýjaður í tengslum við fyrirhugaða uppbyggingu og breytist gildistími þá í 50 ár frá árinu 2021. Heimilt verður að áfangaskipta framkvæmdum í samræmi við samþykkt sveitarfélagsins. Bæjarráð Hafnarfjarðar samþykkti viljayfirlýsingu á fundi sínum í gær.
Viljayfirlýsinguna má lesa hér.
