Byggingarfulltrúinn í Hafnarfirði, Hildur Bjarnadóttir, hefur í tvígang skilað inn teikningum vegna breytinga á Karmelklaustrinu við Ölduslóð 37 þrátt fyrir að skýr ákvæði séu í lögum um mannvirki að byggingarfulltrúa eða starfsmönnum hans sé óheimilt að vinna nokkuð það starf sem kann að koma til afgreiðslu í umdæmi hans.
Í lögum um mannvirki nr. 160 frá 210 segir í 8. grein: Byggingarfulltrúa eða starfsmönnum hans er óheimilt að vinna nokkurt það starf sem kann að koma til afgreiðslu í umdæmi hans.
Í fundargerð frá afgreiðslufundi skipulags- og byggingarfulltrúa 5. desember sl., sem Hildur ritaði, kemur fram að byggingarfulltrúi hafi samþykkt erindi frá Karmelítaklaustrinu sem hafi 2. desember sótt um byggingarleyfi fyrir skýli yfir inngang og lyftu.
Ofan við þennan dagskrárlið segir að byggingarfulltrúi hafi vikið af fundi við afgreiðslu þessa máls og líklega á það við um þetta mál þó eðlilegra hefði verið að þessi setning hefði verið undir þessum dagskrárlið eða komið hefði fram að byggingarfulltrúinn viki undir næsta lið.
Ekki er getið í fundargerðinni hver hafi gert viðkomandi teikningar og heldur ekki hver hafi verið staðgengill byggingarfulltrúa hafi hann vikið af fundi.
Fundinn sátu Hildur Bjarnadóttir byggingarfulltrúi, Þormóður Sveinsson skipulagsfulltrúi, Berglind Guðmundsdóttir arkitekt og Guðrún Guðmundsdóttir verkefnastjóri, allt starfsmenn á skrifstofu umhverfis- og skipulagssviðs.
Segir í fundargerðinni að byggingarfulltrúi samþykki erindið í samræmi við lög um mannvirki nr. 160/2010.
Þá vekur athygli þegar viðkomandi teikning er skoðuð að hún er ekki aðeins gerð og undirrituð af Hildi Bjarnadóttur arkitekt, heldur eru hún líka stimpluð samþykkt af byggingarfulltrúa og þá samþykkt undirritar sú sama Hildur Bjarnadóttir en nú sem byggingarfulltrúi.
Ekki eina málið
Vitað er um þessar tvær teikningar vegna Ölduslóðar 37 en einnig má finna teikningar fyrir hús að Traðarbergi sem gerðar eru af Hildi í janúar 2016, eftir að hún tók við sem byggingarfulltrúi. Þá má finna teikningar af húsi við Álfaskeið sem hún mun hafa unnið að áður en hún var ráðin en hluti teikninganna er dagsettur í mánuðinum áður hún tók til starfa sem byggingarfulltrúi.
Sigurður Steinar Jónsson, aðstoðarmaður byggingarfulltrúa samþykkti 3. október 2018 teikningar af breytingum á Karmelklaustrinu sem Hildur Bjarnadóttir gerði og áritaði með undirskrift sinni og er dagsett 22. september 2018.
Hildur, sem tók við starfi byggingarfulltrúa í október 2015, hefur þótt hörð í horn að taka sem byggingarfulltrúi. Sumir hafa fagnað því að hún hafi verið hörð á því að farið væri eftir lögum og reglum á meðan aðrir hafa gagnrýnt að hún hafi verið ósveigjanleg í sínum störfum.
Með vitund sviðsstjóra
Í svari Sigurðar Haraldssonar sviðstjóra við fyrirspurn Fjarðarfrétta segir hann að þegar Hildur hóf störf hjá Hafnarfjarðarbæ hafi hún verið að klára tvö verk í Hafnarfirði og fékk hún heimild til að klára þau verk.
„Annars hefur hún ekki lagt inn teikningar nema í þessu undantekningartilviki, fyrir nunnurnar, en það verk gerði hún fyrir þær án greiðslu, en þær báru sig illa og Hildur aðstoðaði þær með minni vitund,“ sagði Sigurður í svari sínu.
Ákvæði 8. greinar laga um mannvirki eru mjög afgerandi og hvergi er að finna nein undanþáguákvæði á þessu ákvæði.
Ef horft er framhjá verkinu á Álfaskeiði sem hún hafði unnið áður en hún hóf störf sem byggingarfulltrúi en var samþykkt eftir að hún tók við þá hefur byggingarfulltrúinn unnið tvö verk á embættistíma sínum sem er gegn ákvæðum laga.
