Fyrirtækið RB rúm fagnaði 80 ára starfsafmæli sínu nýlega. Mikið var um dýrðir í glæsilegu húsnæði fyrirtækisins við Dalshraun og fjölmargir gestir fögnuðu með eigendum þessa gamalgróna fjölskyldufyrirtækis.
Ragnar Björnsson ehf. var stofnað 1. desember 1943 og ber fyrirtækið nafn stofnanda síns Ragnari Björnssyni húsgagnabólstrara. Er þetta líklega elsta starfandi fyrirtæki Hafnarfjarðar.
Ragnar var fæddur 1916 á bænum Straumi á Skógarströnd og flutti að heiman aðeins 16 ára gamall þegar hann hóf nám við Menntaskólann á Akureyri. Hann varð þó fljótt auralaus og 18 ára gamall var hann enn á faraldsfæti og hélt til vinnu í Reykjavík.
Fljótlega hóf hann að nema bólstrun á verkstæði frænda síns og upp úr því, þá 27 ára gamall, stofnaði Ragnar húsgagnabólsturverkstæði og er mest lét voru 25-27 bólstrarar í vinnu hjá Ragnari. Það var svo rétt upp úr stríðslokum sem byrjað var að þróa og framleiða springdýnur auk þess sem fyrirtækið hóf framleiðslu á rúmgrindum um 10 árum seinna.
Ragnar kynnist svo Ólafíu Helgadóttir og giftu þau siga 1956 og eignuðust tvær dætur, þær Helgu Þóru og Birna Katrínu sem eru í dag eigendur fyrirtækisins en Birna hefur séð um rekstur þess um langt skeið en Ragnar lést 2004.
Alla tíð hefur fyrirtækið verið hér í Hafnarfirði, fyrst í lítum skúr sem stóð fyrir aftan þar sem nú er Strandgata 33, síðan að Austurgötu 37 og þaðan í gömlu mjólkurstöðina sem stóð á horni Lækjargötu og Öldugötu.
Árið 1963 byggði Ragnar verksmiðjuhús að Dalshrauni 6 þar sem starfsemin var allt til 2003 er hann flutti starfsemin í ný glæsileg húsakynni að Dalshrauni 8. Hafði það verið draumur hans að koma fyrirtækinu í húsnæði með fallegum sýningarsal og góðri aðstöðu fyrir starfsfólk.
Eigin framleiðsla og innflutningur
RB Rúm hafa haft þá sérstöðu umfram marga að framleiða rúm og springdýnur eftir óskum og oft sérþörfum viðskiptavina.
Að sögn Birnu hefur fyrirtækið alltaf haft virkilega duglegt og metnaðarfullt starfsfólk í vinnu og án þess hefði ekki verið fagnað þessum frábæru 80 árum.
Það kemur kannski einhverjum spánskt fyrir sjónir að á þessum tímamótum er RB Rúm í fyrsta sinn með í sölu rúm og dýnur frá öðrum framleiðanda. „Í raun stóðumst við ekki mátið þegar okkur bauðst umboðið fyrir Vispring á Íslandi,“ segir Birna. „Þetta er há gæða vara þar sem allt er náttúrulegt. Shetlandull, hesthár, silki og kasmírull, svo fátt eitt sé nefnt, er uppbyggingarefni þessara dýna og býður Vispring 30 ára ábyrgð á sínum rúmum og dýnum.“
