Allt tiltækt slökkvilið var kallað til að Dalshrauni 15 á fjórða tímanum í dag en þá logaði mikill eldur á efri hæð hússins. Þarna var áður m.a. veislusalurinn Hraunholt og hefur húsnæðinu verið breytt í íbúðarrými. Eldurinn var í nyrðri hluta hússins og logaði út um glugga þegar að var komið. Vatni var dælt á eldinn frá nokkrum stöðum og slökkviliðsmenn rufu göt á þakið til að komast að eldinum sem var fyrst vestan megin í húsinu. Síðar logaði út um glugga, austan megin í húsinu en slökkviliðið náði fljótt að slökkva þann eld.
Fóru menn frá slökkviliðinu inn í húsnæði Húsasmiðjunnar, sem þar er undir en starfsmaður Húsasmiðjunnar taldi að þar væri mikið skemmt af vatni og reyk. Reykur virtist þó ekki vera næst inngangi verslunarinnar og enginn eldur komst í verslunina.
Fjórum mönnum var bjargað af svölum hússins skv. heimildum RÚV en ekki er vitað að neinn hafi slasast.
Fjölmargir hafa misst heimili sitt í brunanum en húsnæðið er eitt fjölmargra sem leigt er út, ekki síst til erlendra starfsmanna en á samþykktri teikningu frá 2009 eru í húsnæðinu 5 litlar íbúðir og um 26 svefnpokapláss.
