Ný talning og yfirferð á gögnum hafa leitt í ljós að 16. janúar eru „aðeins“ 161 á biðlista eftir félagslegu húsnæði en þeir voru 236 skv. yfirliti frá 19. september 2023.
Enginn þessara virðast þó hafa fengið félagslegt húsnæði.
Var það metið svo að biðlistinn frá í september væri ekki að gefa skýra mynd af stöðunni eins og hún væri, og nauðsynlegt væri að skoða biðlistann og uppfæra hann, svo hann gæfi sem réttustu mynd af þörfinni hjá umsækjendum og stærð íbúða sem þörf er á.
Voru þeir sem voru á biðlistanum endumetnir, haft var við þá samband og óskað eftir nýjum gögnum vegna tekna ásamt nýjum upplýsingum um húsnæðisaðstæður og félagslegar aðstæður umsækjenda. Fækkaði þá um 75 á listanum.
Helstu þættir sem hafa haft áhrif á fækkun einstaklinga á biðlista eru eftirfarandi:
- Félagslegar aðstæður og húsnæðisaðstæður komnar í betri farveg, fólk taldi ekki þörf á því að vera lengur á biðlista eftir félagslegu leiguhúsnæði
- Umsækjendur voru ekki að ná lágmarksstigafjölda til þess að vera á biðlista
- Flutningar úr sveitarfélaginu
49 fjölskyldur bíða eftir fjögurra herbergja íbúð
Á listanum nú eru 82 umsækjenda metnir með brýna þörf á húsnæði, með 8-10 stig.
75 eru skráðir með 6-7 stig en skv. reglum Hafnarfjarðarbæjar segir að þeir sem fá 6 stig eða meira skulu skráðir á biðlista. Þó eru einnig 4 skráðir með 5 stig eða færri.
Flestir eða 76 eru á biðlista eftir 2ja herbergja íbúð, 42 eftir þriggja herbergja íbúð og 29 eftir fjögurra herberbergja íbúð.
Við forgangsröðun er haft til viðmiðunar tekjur umsækjanda, húsnæðisaðstæður og félagslegar aðstæður.
Verður að ganga hraðar hjá Hafnarfjarðarbæ
Í bókun fulltrúa Samfylkingarinnar á fundi fjölskylduráðs í morgun segir m.a.: „Hvað sem líður endurmati umsókna þá er ljóst af framlögðum upplýsingum að fjölgun félagslegra íbúða verður að ganga hraðar hjá Hafnarfjarðarbæ. Fulltrúar meirihluta Framsóknar- og Sjálfstæðisflokks höfnuðu tillögum Samfylkingarinnar sem miðuðu einmitt að því við afgreiðslu fjárhagsáætlunar 2024 þann 4. des. sl. Annars vegar var um að ræða tillögu um að hækka fjárheimildir til kaupa á félagslegum íbúðum úr 200 milljónum í 400 milljónir og hins vegar tillögu um að Hafnarfjörður setji sér skýra stefnu í málaflokknum til framtíðar þar sem markmið bæjarins yrði að fjölga um 15 íbúðir í kerfinu á ári næstu fimm árin.“
