Veðrið lék við bæjarbúa að morgni þjóðhátíðardags og fánarnir sem skátarnir höfðu dregið upp víða um bæinn héngu niður logninu. Fjölmennt var í skrúðgöngunni frá Flensborgarskóla sem leidd var af fánaborg skátanna í Hraunbúum og Lúðrasveit Hafnarfjarðar.
Dreifðist fólk strax á nokkra staði, Hörðuvelli, Strandgötuna, Hellisgerði og Víðistaðatún þar sem Víkingahátíðin var.
Hátíðardagskrá var á Thorsplani, hoppukastalar voru á Linnetsstíg, við bókasafnið, við gamla Lækjarskóla og á Hörðuvöllum og óvenjumargir sölubásar voru í bænum, ekki aðeins frá félögum í bænum sem söfnuðu fyrir starf sitt, heldur mátti einnig sjá fyrirtæki með sölubása sem voru í miðbænum auk matarvagna.
Fjallkonan í ár var Björk Níelsdóttir sem flutti frumsamið ljóð og var flutningur hennar einkar glæsilegur.
Má ég heyra þig syngja
og segja þína sögu?
varlega stígum við saman
stutt skref
eitt í einu
hönd þín í lófa mínum
Viltu leiða mig heim?
framhjá bláum boga
lítilli tjörn
grænu túni
og skrýtnum blómastandi
Viltu leiða mig heim?
framhjá rósastíg
angandi öspum í Hellisgerði
hundaskít á Hverfisgötu
og gamla rauða húsinu mínu
Viltu leiða mig heim?
framhjá grænni og hvítri kirkju
við göngum upp á Hamar
og horfum á bát á lygnum sjó.
Viltu leiða mig heim?
Þú staðnæmist
andar að þér sjávarlofti
og ég kyssi þig
með salt á vörum
sumarnóttin er í sparifötum
Ég leiði þig heim.
Dagskrá lauk um kl. 17 en kvölddagskrá var svo á Thorsplani frá kl. 19 til kl. 22.
Hér má sjá nokkrar myndir frá þjóðhátíðardeginum sem ljósmyndari Fjarðarfrétta tók:
