Flórgoðinn er mættur á Hvaleyrarvatn eins og sjá má á myndum sem Ómar Smári Ármannsson tók fyrir Fjarðarfréttir en hann segir komu parsins vera skv. áætlun.
Segir Ómar Smári að nokkur flórgoðapör hafi síðasliðin ár reynt þar við hreiðurgerð, en hundar, sem att hafi verið út í vatnið af eigendum þeirra, hafi fælt sum þeirra frá. Eflaust hafa framkvæmdir við nýjan stíg vestan við vatnið líka getað truflað flórgoðaparið en stígurinn er örskammt frá svæði þar sem fuglarnir hafa komið upp hreiðri.
„Sennilega væri auðveldara að kenna hundunum að lesa á bannskiltin við bílastæðin en sumum eigendum þeirra, af fenginni reynslu,“ segir Ómar Smári en hann hefur undanfarin ár fylgst vel með flórgoðanum við Hvaleyrarvatn.
Lausaganga hunda er bönnuð við Hvaleyrarvatn og nú er sérstaklega mikilvægt að gefa flórgoðanum góðan frið og eru gestir hvattir til að ganga með virðingu í kringum Hvaleyrarvatn í sumar.
Fróðleik um flórgoðann má finna hér á Fuglavefnum
