Umhverfis- og framkvæmdaráð hefur heimilað umhverfis- og skipulagssviði að fara í forval á verktökum vegna byggingar á nýjum grunnskóla í Hamranesi.
Hefur starfshópur um undirbúning að byggingu Hamranesskóla ákveðið að farið verði í alútboð við byggingu hans.
Starf skólans hófst í raun í fjórum færanlegum kennslustofum við Skarðshlíðarskóla vegna tafa á byggingu skóla í Hamranesi en í júní sl. voru 50 börn með lögheimili í Hamranesi með samþykkta skólavist í Skarðshlíðarskóla í vetur.
Í minnisblaði sem fræðslustjóri tók sama er tekið sérstaklega fram að börn sem nú þegar eru fluttir í Hamranesið koma til með að hefja skólagöngu sína í Skarðshlíðarskóla enda sé sá skóli ekki full setinn. Til viðbótar við þau rými sem þar eru bætast við færanlegar kennslustofur. Hamranesskóli hefur starfsemi sína í færanlegum kennslustofum með ráðningu skólastjóra í ágúst 2025 eða eins og segir í minnisblaði, „Auglýst verður eftir skólastjóra í janúar 2025 sem tekur til starfa við undirbúning skólastarfs og stofnun Hamranesskóla frá 1. ágúst 2025. Hann tekur þátt í hönnunar- og hugmyndavinnu að innra starfi og stefnu skólans“
Skólastarf hefjist í nýjum skóla haustið 2026
Gert er ráð fyrir að bygging skóla í Hamranesi hefjist á næsti ári og að fyrstu nemendur hefji þar skólagöngu haustið 2026 og starfsemi verði að fullu í skólanum 2028.
Áætlað er að börn á leik- og grunnskólaaldri verði rúmlega 800 í skólanum en reiknað er með að börn úr Hamranesi verði nálægt 140 í Skarðshlíðarskóla haustið 2025.
Á þriðja fundi starfshópsins 5. september sl. segir að meginhugmyndafræðin sé að fara í einn Hamranesskóla fyrir 1-16 ára með sameiginlegri stjórn, einum skólastjóra og tveimur aðstoðarskólastjórum.
Leik- og grunnskóli
Hugmyndafræðin gengur út á að um sé að ræða samfellda skólagöngu barna og skilin milli
leik- og grunnskólastigs séu ógreinileg og aðgengi að sérgreinastofum og sameiginlegum
rýmum sé fyrir öll börn í skólanum.
Hópurinn hefur skoðað fyrirkomulag á aðstöðu til íþróttaiðkunar, hvort byggja eigi skólaíþróttahús eða hverfisíþróttahús. Hvort aðstaða fyrir sundkennslu verði innan skólans eða með nýtingu á hverfislaug. Þá voru umræður um það hvort bókasafn skólans geti þjónað sem hverfisbókasafn sem útibú frá Bókasafni Hafnarfjarðar.
