Þegar framkvæmdir eru á gangstéttum eða stígum bæjarins er sjaldgæft að sjá að gangandi sé ætluð önnur gönguleið, hvað þá að mörkuð sé þeirra leið með vörnum gegn umferðinni.
Undanfarið hefur mátt sjá að gangstétt hefur verið grafin upp á aðal gönguleiðinni meðfram Hlíðarbergi. Uppgröfturinn er látinn á þá litlu grasflöt sem eftir er á milli vegar og gangstéttar og alls ekki gert ráð fyrir að gangandi fari þarna um.
Gangandi hafa velt því fyrir sér hvort virkilega sé engin virðing borin fyrir gangandi? Þarna hefði eðlilega átt að vera búið að taka hluta af götunni undir gangandi og setja steina á milli til að verja gangandi.
- Eru engar reglur í Hafnarfirði um aðgerðir þegar gönguleiðir eru skertar?
- Er ekkert eftirlit með því að framkvæmdaaðilar tryggi öryggi gangandi?
Ekki er langt síðan hér birtist frétt um þegar djúpur skurður var grafinn þvert á gönguleið við nýju Ásvallabrautina, án nokkurrar viðvörunar.
Er þetta svona víðar í bænum?
Hefur þú ábendingu, sendu á fjardarfrettir@fjardarfrettir.is
