Hafnfirðingar hafa eignast fjallveg. Það heyrist æ oftar talað um fjallveginn þegar talað er um nýju Ásvallabrautina enda hefur þurft að nota stórvirkar vinnuvélar við að ryðja af henni snjó svo hún sé fær.
Hefur gríðarlegur snjór safnast fyrir í vegstæðinu og við hlið þess og lítið þurft að blása til að yrði ófært. Því var brugðið á það ráð að fá snjóblásara til að hreinsa meðfram veginum til að minnka hættuna á að vegurinn lokaðist við minnsta skafrenning.
Vegurinn er aðgreindur með vegriði á kafla næst Skarðshlíðinni en svo verður hann einbreiður án þess að neinar merkingar gefi það í ljós og í léttum skafrenningi er jafnvel erfitt að sjá hvar vegbrúnin er, allavega þeim megin sem engir ljósastaurar eru.
Það verður spennandi að sjá hvernig þetta muni breytast á næstu árum þegar byggðin eykst og gróður vex upp. En á meðan eigum við allavega fjallveg í miðjum Hafnarfirði.
