Björgvin Stefánsson skoraði bæði mörk Hauka í 2:0 sigri þeirra gegn Þór í 1. deild karla í knattspyrnu á Ásvöllum í kvöld.
Fyrra mark Björgvins kom á 77. mínútu eftir langa sendingu frá Baldvini Sturlusyni til Björgvins sem skoraði framhjá Aroni, markmanni Þórs. Þórsarar vildu fá dæmda rangstöðu en fengu hana ekki.
Seinna mark Björgvins kom á 88. mínútu er löng sending kom inn fyrir vörn Þórs, til Björgvins sem hélt boltanum hjá sér og skoraði í fjær hornið.
Fyrir leikinn höfðu Þórsarar verið taplausir í síðustu sex leikjum þeirra og höfðu unnið 5 af þeim leikjum. Haukar aftur á móti höfðu unnið seinustu tvo leiki.
