Svandís Svavarsdóttir heilbrigðisráðherra tilkynnti fyrir stundu á Sólvangi vilyrði fyrir því að bætt yrði við 33 nýjum hjúkrunarrýmum fyrir aldraða á gamla Sólvangi en Svandís skoðaði nýbygginguna við Sólvang í tengslum við kjördæmafund þingmanna í Hafnarborg.
Í upphafi skoðunarferðar um nýbygginguna færði heilbrigðisráðherra Rósu Guðbjartsdóttur bæjarstjóra í Hafnafirði bréf sem svar við beiðni sveitarfélagsins um viðbótar hjúkrunarrými í endurbættum Sólvangi. Sagði hún að verkefnið sem Hafnarfjarðarbær væri að fara í væri til fyrirmyndar, það væri lausnamiðað og byggt á því sem vel hafi verið gert áður og fjármunum væri vel varið með því að endurnýta gamla Sólvang. Sagði hún þetta verkefni allra hagur og því væri henni það sérstaklega ánægjulegt að afhenda þetta svar því þetta væri samþykki á góðu verkefni Hafnarfjarðarbæjar.
Ákvörðunin er liður í stórátaki stjórnvalda um uppbyggingu hjúkrunarrýma sem heilbrigðisráðherra kynnti fyrr á þessu ári með framkvæmdaáætlun til ársins 2023.
Ákvörðun fagnað
Bæjarstjóri fagnaði bréfinu vel og sagði þetta algjörlega frábærar fréttir og mikilvægt skref til að byggja upp þessa öldrunarmiðstöð á þessu fallega svæði.
Hún upplýsti að hún hafi nýlega verið búin að óska eftir fundi með ráðherra en hafi fengið þau svör að það ætti að vera möguleiki einhvern tímann í október svo hún væri ákaflega ánægð með þetta svar ráðherra.
Helga Ingólfsdóttir, formaður vinnuhóps um hjúkrunarheimili sagðist einnig ákaflega ánægð með þessa ákvörðun enda hafi hópurinn unnið að því að sýna fram á hversu hagkvæmt þetta verkefni væri og hrósaði ráðherra fyrir að sjá það og framkvæma.
Bæjaryfirvöld í Hafnarfirði hafa lengi barist fyrir því að fá viðbótarrými þar sem þörfin er mjög mikil en hafa hingað til ekki haft erindi sem erfiði.
Þegar nýbyggingin við Sólvang verður tekin í notkun færast þeir sjúklingar sem nú eru á Sólvangi þangað og aðeins fjölgar um eitt rými.
Gera þarf miklar endurbætur á Sólvangi til að mæta nútímalegum kröfum en reiknað er með að 11 sjúklingar verði á hverri hæð en neðsta hæðin verður svo hægt að nýta undir þjónustu við aldraða.
Reiknað er með að byggingu hins nýja hjúkrunarheimilis ljúkí í febrúar á næsta ári og eftir það taki um 12-18 mánuði að endurbyggja rýmin á Sólvangi en forhönnun er þegar lokið.
Þetta er mikilvægur áfangi því aldraðir sem þurft hafa hjúkrunarþjónustu hafa jafnvel þurft að leita langt út fyrir höfuðborgarsvæðið eftir dvalarrými sem víða eru af skornum skammti.
