Heitavatnslaust verður í öllum Hafnarfirði, Garðabæ, Kópavogi, Norðlingaholti, Breiðholti, Hólmsheiði, Almannadal og á Álftanesi frá kl. 10 í kvöld, mánudaginn 19. ágúst, og þar til á hádegi miðvikudaginn 21. ágúst.
Hefur ekki áður verið lokað á svona stóru svæði í svona langan tíma. Í fyrra á sama tíma var lokað fyrir heitt vatn í öllum Hafnarfirði á annan sólarhring þegar stofnæð var stækkuð.
Lokað verður fyrir flutningsæð hitaveitu, Suðuræð, sem flytur heita vatnið frá jarðvarmavirkjunum á stóran hluta af höfuðborgarsvæðinu.
Verið er að tengja fyrsta áfanga Suðuræðar 2 við dreifikerfið og þá þarf að taka heita vatnið af. Áhrifin eru mikil á stórt svæði. Verður tíminn nýttur og öðrum aðkallandi verkum sinnt samtímis.
Í kvöld hefst vinna við að tæma heita vatnið af Suðuræð til að hægt sé að tengja nýju lögnina. Tæming tekur nokkrar klukkustundir og þá hefst vinna á fimm ólíkum stöðum í kerfinu. Bætt verður við búnaði, rekstraröryggi í nýjum hverfum aukið og nauðsynlegu og fyrirbyggjandi viðhaldi í kerfinu sinnt. Viðamesta verkið er að tengja Suðuræð 2, en að því loknu verður heita vatninu hleypt á kerfið aftur hægt og örugglega.
Gangi allt eftir áætlun ætti kerfið að hafa náð fullum þrýstingi um hádegisbil miðvikudaginn 21. ágúst.
Markmiðið er að auka flutningsgetu hitaveitunnar til að allir íbúar á svæðinu hafi nauðsynlega innviði og lífsgæði til framtíðar.
Nánari upplýsingar og leiðbeiningar frá Félagi pípulagningameistara fyrir húseigendur má finna á vef Veitna https://www.veitur.is/bilanir/suduraedarlokun_agust_2024
