Heitavatnslaust verður í öllum Hafnarfirði og litlum hluta Garðabæjar frá kl. 22 mánudaginn 21. ágúst til kl. 10 að morgni miðvikudags 23. ágúst.
Þetta er nauðsynlegt vegna þess að nú er komið að því að tengja nýja stærri stofnlögn Veitna við kerfið sem tryggja á öllum íbúum Hafnarfjarðar heitt vatn til næstu áratuga.
Veitur hafa skipulagt lokunina þannig að hún verði á þeim tíma þegar minnst notkun er á heitu vatni.
Verið er að skipta út stofnlögn sem legið hefur meðfram Reykjanesbraut frá Kaplakrika að dælustöð við Lækjargötu.
Vegna mögulegrar breikkunar Reykjanesbrautar var ákveðið að færa lögnina inn á Álfaskeið oig Sólvangsveg og hafa framkvæmdir staðið yfir síðan í nóvember á síðasta ári með miklum truflunum á umferð í hverfinu. Reiknað er með að öllum framkvæmdum ljúki nú í haust.
Lokanir í Garðabæ einnig
Eftirfarandi götur í Garðabæ verða fyrir áhrifum af lokuninni: Boðahlein, Naustahlein, Hraunholt, Hraungarðar, Hraunhóll, Hraunhamrar, Hrauntunga, Hraunkot, Hraunborg, Gimli, Björk, Brandstaðir, Garðahraun, Miðhraun, Norðurhraun, Suðurhraun og Vesturhraun.
