Íbúar í Setbergi hafa sent Hafnarfjarðarbæ kvörtun vegna auglýsingaskiltis á horni lóðar Kaplakrika við Reykjanesbraut og var kvörtunin tekin fyrir á fundi skipulags- og byggingarráðs í gær.
Að mati þeirra sem senda inn kvörtunina þykir lýsingin á skiltinu of björt auk þess sem stutt sé á milli flettinga.
Skiltið var áður upplýst flettiskilti með þrjá auglýsingafleti en ekki er langt síðan því var breytt í ljósaskilti með einn auglýsingaflöt. Þetta er ekki eina skiltið sem kvartað hefur verið yfir á lóð Kaplakrika því markataflan, skammt frá hringtorginu við Flatahraun hefur einnig verið á milli tannanna á fólki. Veitt hafði verið heimild fyrir nýrri markatöflu en hvergi kom fram í umsókn að hún yrði ljósa-auglýsingaskilti sem snúið yrði að ökumönnum þegar leikur væri ekki í gangi.
Engin ljósastýring virðist vera á þessum skiltum eins og sjá má á velheppnuðum ljósaskiltum í nýjum biðstöðvum strætisvagna. Hafa vegfarendur kvartað yfir því að sterkt ljós frá skiltunum trufli þá við akstur.
Skipulags- og byggingarráð fól skipulagsfulltrúa að afla gagna frá forsvarsmönnum FH.
