Þegar malarflutningaskipið Nordfjord kom að Hvaleyrarbakka í Hafnarfjarðarhöfn um hádegisbil í gær, urðu hafnarstarfsmenn varir við að eitthvað torkennilegt lá utan á perustefni skipsins. Í ljós kom að það var hvalur, sem skipið hafði siglt á úti á Faxaflóa og borið með sér á perunni alla leið í höfn.
Í fyrstu var talið um um hrefnu væri að ræða en við nánari skoðun sérfræðinga Hafrannsóknastofnunar, sem eru með sínar höfuðstöðvar við hafnarbakkann í Hafnarfirði, kom í ljós að hér var langreyður á ferðinni, um 17 metra löng.
Hvalinn rak frá malarskipinu í gær undan stífri austanátt inn í grjótgarðinn þar sem flotkvíin liggur. Erfitt var að komast að hvalnum, í bröttum grjótgarðinum, en með aðstoð félaga úr Björgunarsveit Hafnarfjarðar tókst um miðjan dag í gær að koma tógi á hvalinn. Stefnt er að því að draga hann úr höfninni á morgunflóðinu í fyrramálið. Þá munu sérfræðingur Hafrannsóknastofnunar taka sýni úr hvalnum og honum síðan sökkt á sínum fyrri heimaslóðum.
Þetta kemur fram í tilkynningu frá Hafnarfjarðarhöfn.
