Konukvöldin í Firði hafa verið árviss viðburður vor og haust og líflegt var á einu slíku 2. maí sl.
Tæplega 80 ára unglingurinn, hún Mjöll Hólm steig fyrst á svið og heillaði fólk með hressilegri framkomu og gullfallegum söng. Enginn söngkona hefur átt eins langan feril og hún en hún byrjaði að syngja árið 1959 og hefur sungið alla tíð síðan. Langfrægasta lagið sem hún gaf út er eflaust lagið „Jón er kominn heim“ sem kom út árið 1971. Hún réði sig í hljómsveit Elfars Berg, sem margir muna eftir sem sjoppurekanda á Holtinu í Hafnarfirði og einnig með hljómsveit Karl Lillendahls.
Næst var það hinn rétt tæplega 82 ára Garðar Guðmundsson sem steig á svið og söng fyrir fyrstu gesti konukvöldsins. Garðar er af fyrstu kynslóð íslenskra rokkara og var um tíma þekktur sem hinn íslenski Cliff Richards.
Hann söng með mörgum vinsælum hljómsveitum, söng með Hljómsveit Aage Lorange, hljómsveit Árna Ísleifs og Hljómsveit Skapta Ólafssonar svo ekki sé minnst á KK sextettinn og Diskó kvintettinn.
Það var ekki að heyra á röddinni að hann væri að verð 82 ára og heillaði fólk með söng sínum.
Idolstjarnan Jóna Margrét Guðmundsdóttir úr Mosfellsbænum heillaði gesti upp úr skóm og sökkum með mögnuðum söng og stemmningin var mjög góð.
Tómas Helgi Wehmeier steig svo á svið með gítarinn en hann flutti m.a. lagið Ég og þú í söngvakeppninni 2018. Fólk var í góðum gír í Firði með allt þetta flotta tónlistarfólk.
Það var svo Látúnsbarkinn og Hafnfirðingurinn Bjarni Arason sem lauk tónlistarveislunni með sínum eldmóð og kröftugum söng.
Góð verslun og margt í boði
Þó oft hafi verið fleiri á konukvöldi í Firði þá eru fulltrúar Fjarðar nokkuð ánægðir og verslun mjög lífleg í mörgum verslunum. Boðið var upp á hressingu í verslunum og allir í hátíðaskapi, tilboð í gangi og kynningar á ýmsum vörum á göngum Fjarðar.
Allir sem komu fengu happdrættismiða og voru vinningar veglegir.
