Á morgun, laugardaginn 28. nóvember, verður sýningin Hafnarfjörður – verk úr safneign opnuð í aðalsal Hafnarborgar.
![](https://www.fjardarfrettir.is/wp-content/uploads/2020/11/Hafnarborg_Hafnarfjordur-Eyjolfur-J-Eyfells-03.jpg)
Það er ekki bara Hafnfirðingum sem þykir Hafnarfjörður fallegur, heldur hefur samspil byggðarinnar og hraunsins í Hafnarfirði sömuleiðis heillað marga listmálara í gegnum tíðina.
![Suðurgatan eftir Gísla Jónsson](https://www.fjardarfrettir.is/wp-content/uploads/2020/11/Hafnarborg_Hafnarfjordur-Gisli-Jonsson-02.jpg)
Í safneign Hafnarborgar eru fjölmörg verk sem tengjast bænum, þau elstu frá því snemma á 20. öld. Nú er leitað í þennan fjársjóð og Hafnfirðingum og gestum þeirra gefið tækifæri til að sjá hvernig staðarandi bæjarins birtist í myndlistarverkum frá því á síðustu öld.
![](https://www.fjardarfrettir.is/wp-content/uploads/2020/11/Hafnarborg_Hafnarfjordur-Jon-THorleifsson-01.jpg)
Hér má sjá bæinn í gegnum augu listamanna, þar á meðal helstu meistara íslenskrar myndlistar. Meðferð þeirra á viðfangsefninu er hefðbundin, fígúratíf nálgun þar sem þekkja má fyrirmyndina úr veruleikanum.
![Mynd eftir Jón Engilberts](https://www.fjardarfrettir.is/wp-content/uploads/2020/11/Hafnarborg_Hafnarfjordur-Jon-Engilberts-09.jpg)
Hafnarfjörður er einstaklega myndrænn bær og náttúran umhverfis býður einnig upp á mikilfengleg sjónarhorn. Fyrir utan Reykjavík eru fáir þéttbýlisstaðir á Íslandi myndefni jafn margra listaverka og Hafnarfjörður. Verkin sem nú eru sýnd eru mörg úr stofngjöf hjónanna Ingibjargar Sigurjónsdóttur og Sverris Magnússonar sem ráku apótek í húsnæði Hafnarborgar um áratuga skeið. Hluti verkanna hefur undanfarin ár hangið í fundarsal bæjarstjórnar Hafnarfjarðar.
![](https://www.fjardarfrettir.is/wp-content/uploads/2020/11/Hafnarborg_Hafnarfjordur-Gunnlaugur_Scheving05.jpg)
Meðal listamanna sem eiga verk á sýningunni eru Nína Tryggvadóttir, Hörður Ágústsson, Jóhannes Kjarval, Jón Gunnarsson, Gréta Björnsson og Jón Engilberts.
![](https://www.fjardarfrettir.is/wp-content/uploads/2020/11/Hafnarborg_Hafnarfjordur-Finnur-Jonsson-07.jpg)
Þessi sýning varð til á stuttum tíma þegar ákvörðun var tekin um að fresta fyrirhugaðri sýningu á verkum Libiu Castro og Ólafs Ólafssonar vegna samkomutakmarkana.
![](https://www.fjardarfrettir.is/wp-content/uploads/2020/11/Hafnarborg_Hafnarfjordur-10.jpg)
Gunnlaugur Scheving og kvart kíló af skyri
Til gamans er svo birt hér skemmtileg frásögn Gunnlaugs Schevings þegar hann fór í mjólkurbúð í Hafnarfirði og bað um kvart kíló af skyri.
Úr viðtali við RUV um 1966 en tengist ekki sýningunni í Hafnarborg.