Stella B. Kristinsdóttir er fagstjóri frístundastarfs hjá Hafnarfjarðarbæ og vinnur hún m.a. náið með frístundaheimilum og félagsmiðstöðvum sem starfandi eru við alla grunnskóla í Hafnarfirði. Hún er ein þeirra sem heldur utan um skipulagningu á fjölbreyttu og skapandi sumarstarfi á vegum tómstundamiðstöðva í bænum. Þátttaka í skipulögðu starfi ýtir bæði undir vellíðan og félagslega færni. Nær þetta bæði til starfs á vegum sveitarfélagsins og til fagstarfs og námskeiða allra félaganna í bænum.
Uppbyggileg sumarfrístund í öllum frístundaheimilum
„Líkt og áður þá munum við bjóða upp á sumarfrístund fyrir 7-9 ára á vegum frístundaheimilanna. Námskeið verða í boði í öllum frístundaheimilum frá 14. júní til 2. júlí og aftur 4. – 23. ágúst sem er breyting frá því sem áður var en þá voru í boði tvö miðlæg námskeið á seinna tímabili fram að skólabyrjun. Dagana 5. júlí – 3. ágúst verður í boði miðlægt námskeið í Krakkabergi í Setbergsskóla þannig að það er eitthvað í boði á vegum frístundaheimilanna í allt sumar,“ segir Stella. Sumarfrístund inniheldur fjölbreytta dagskrá sem samanstendur af skapandi verkefnum, leikjum, hreyfingu, spennandi ferðum, dorgveiði, sundferðum og sameiginlegum viðburðum. „Dagskrá getur verið breytileg eftir því hvaða frístundaheimili er valið og því um að gera að kynna sér dagskrána vel og jafnvel breyta til. Frístundaheimilin bjóða einnig uppá sumarfrístund fyrir útskriftarhópa leikskólanna í ágúst þar sem nýir nemendur fá tækifæri til að kynnast skólanum sínum, sínu frístundaheimili og nærumhverfi skólans með það að leiðarljósi að auka öryggi þeirra og vellíðan við upphaf skólagöngu“.
Teiknað, málað og mótað
Hafnarborg, menningar- og listamiðstöð, verður með myndlistarnámskeið fyrir börn á aldrinum 6-12 ára þar sem undirstöðuatriði myndlistar eru kynnt í gegnum rannsóknir á umhverfinu, sýningar í safninu og skapandi vinnu. Unnin verða verkefni í fjölbreytta miðla – teiknað, málað og mótað – með það að markmiði að þjálfa sjónræna athygli, örva skapandi hugsun og persónulega tjáningu barnanna.
Allt frá tónlistarsmiðju í tilraunaeldhús
Félagsmiðstöðvarnar í Hafnarfirði halda úti námskeiðum í júní fyrir börn sem voru að ljúka 4. – 7. bekk með það fyrir augum að viðhalda virkni þeirra í sumarfríinu, gefa þeim tækifæri á að hitta önnur börn og hafa áhugaverðar smiðjur til að sækja. Námskeiðin verða haldin í Lækjarskóla og Hvaleyrarskóla. „Hægt er að sækja mismunandi smiðjur, allt frá tónlistarsmiðju í tilraunaeldhús og geta börnin mætt eins oft og þegar þeim hentar í tvær vikur í senn. Námskeiðin hafa ekki verið aldursskipt en til skoðunar er að bjóða upp á sér námskeið fyrir 7. bekk til tilrauna í tvær vikur,“ segir Stella. Börnum í 4. til 7. bekk með sértæka stuðningsþörf stendur til boða að sækja Sumarklettinn þar sem unnið er með styrkleika og þarfir hvers og eins.
Öll virkni og samvera skiptir máli
„Það skiptir miklu máli fyrir börn okkar og ungmenni að viðhalda einhverri virkni og félagsstarfi yfir sumartímann líkt og allt árið um kring og þá ekki síst þegar foreldrar og forráðamenn eru sjálfir í vinnu. Hafnarfjarðarbær, stofnanir, samtök og íþróttafélög í Hafnarfirði eru með fjölbreytt starf í gangi allt árið þannig að allir ættu að geta fundið ástundun við hæfi. Í fyrra og í ár höfum við í gegnum sumarstörf fyrir námsmenn búið til nýsköpunarstörf þar sem við reynum að auka aðgengi að tómstundum yfir sumartímann. Verkefnið hefur gengið út á það að draga úr einangrun yfir sumartímann með því að bjóða persónulega þjónustu og aðstoð við skráningar. Það tók gildi í sumar að hægt er að nota sérstakan styrk fyrir börn sem koma af tekjulægri heimilum á sumarnámskeið og fögnum við því að það sé verið að jafna tækifæri þeirra fjölskyldna til þátttöku í íþróttum eða sumarstarfi. Vinnuskóli Hafnarfjarðar er svo kjörinn vettvangur fyrir ungmenni frá 14 ára aldri. Fastur liður í tilverunni með útiveru og hressandi félagsskap jafnaldra. Með aukinni umhverfishugsun, sjálfbærni og áhuga hefur eftirspurn eftir fjölskyldugörðum Hafnarfjarðarbæjar farið vaxandi og er þar um að ræða frábært tækifæri fyrir fjölskyldur og aðra til að rækta sitt eigið grænmeti yfir sumartímann,“ segir Stella sem hvetur að endingu alla til að taka þátt í sumarlestri á vegum Bókasafns Hafnarfjarðar sem lýkur með uppskeruhátíð í sumarlok.
Greinin birtist í Fjarðarfréttum, 1. tbl. 19. árg. 26. maí 2021
Fjarðarfréttir – sérblað: Hafnfirsk æska
Fjarðarfréttir 1. tbl. 19. árg. 26. maí 2021. Sérblað um sumarstarf barna og umgmenna í Hafnarfirði.
