Jólaþorpið í Hafnarfirði verður opnað á föstudagskvöldið kl. 18 með fjölbreyttri dagskrá á Thorsplani þegar ljósin verða tendruð á jólatrénu.
Í ár er það enginn annar en Laddi, Þórhallur Sigurðsson, sem mun segja frá jólunum sínum sem ungur drengur í Hafnarfirði, tendra ljósin á jólatrénu og telja í nokkur jólalög. Lúðrasveit Hafnarfjarðar og karlakórinn Þrestir flytja jólalög og þá mun Jón Jónsson skemmta gestum.
Á laugardag verða „Syngjandi jól“ í Hafnarborg sem fyllist af söng og hátíðaranda þegar fjölmargir kórar Hafnarfjarðar skipaðir söngfólki á öllum aldri koma saman.
Klukkan 14 syngur Kvennakór Hafnarfjarðar í jólaþorpinu og Jóhanna Guðrún og Davíð Sigurgeirsson syngja og skemmta gestum klukkan 14.30.
Jólaball á sunnudag
Á sunnudaginn þenur Sveinn Sigurjónsson nikkuna kl. 13.30 og Jólabjöllurnar syngja svo fallega jólatóna í framhaldi af því. Klukkan 14.30 stígur svo Jónsi, Jón Jósep Snæbjörnsson á sviðið og flytur úrval jóladægurlaga og svo verður blásið í jólaball með þeim Skoppu og Skrítlu og ballerínum úr Listdansskóla Hafnarfjarðar.
Jólaþorpið verður opið alla laugardaga og sunnudaga á aðventunni frá kl. 12-17 og til kl. 22 á Þorláksmessu. Gestir Jólaþorpsins í ár geta gengið á milli tuttugu fagurlega skreyttra jólahúsa sem eru orðin landsþekktur söluvettvangur fyrir ýmiskonar gjafavöru, handverk og hönnun sem tilvalið er að setja í jólapakkann ásamt gómsætum veitingum og vörum til að taka með heim á veisluborðið.
Ljósin tendruð á Cuxhaventrénu
Kl. 15 á laugardag verður tendrað á jólatrénu við Flenborgarhöfn en tréð er gjöf frá vinabæ Hafnarfjarðar í Þýskalandi, Cuxhaven. Þýski sendiherrann mun tendra ljósin, Lúðrasveit Hafnarfjarðar leika, leikskólabörn úr Bjarkalundi syngja og jólasveinar verða á vappi.
