Dagur tónlistarskólanna haldinn hátíðlegur um allt land sl. laugardag. Hér í Hafnarfirði hófst dagurinn með hljóðfærakynningu í Hásölum þar sem kennarar kynntu þau hljóðfæri sem kennt er á við skólann fyrir elsta hópi forskólans. Að lokinni kynningu fengu nemendur síðan að ganga á milli stofa og prófa hin ýmsu hljóðfæri og var mikil stemmning í hópnum. Sumir prófuðu mörg hljóðfæri og aðrir færri. Eftir hádegi voru síðan fernir tónleikar bæði á Torginu og í salnum þar sem einleikarar, ýmis samspil og sinfóníuhljómsveit skólans kom fram.
Vikuna á undan var samspilsvika í skólanum Var farið í heimsókn á Sólvang, í Drafnarhúsið, á Hrafnistu, í Fjörð og á fleiri staði og hádegistónleikar voru á fimmtudeginum í Hafnarborg. Í skólanum þessa viku voru einnig æfð ýmis atriði sem eiga eftir að koma fram síðar. Á föstudagsmorgninum komu á fjórða hundrað leikskólaskólabörn frá 16 leikskólum í heimsókn. Þetta var elsti hópur leikskólanna og fengu þau að hlýða á strengjasveit, gítarsveit og forskólahóp leika 3 lög og einnig léku fjölmargir nemendur á önnur hljóðfæri m.a. píanó, þverflautu, óbó, klarinett og saxófón. Var þetta því hin besta hljóðfærakynning fyrir þau.
Tónlistarskólinn tók þátt í Safnanótt. Spiluðu nemendur á Bókasafninu, Byggðasafninu og í Hafnarborg. Einnig léku samspilshópar á Norðurbakkanum-kaffihúsi. Allir stóðu krakkarnir sig mjög vel og voru skólanum sínum til sóma.
Í söfnum bæjarins var vel tekið á móti gestum sl. föstudagskvöld, sýndarveruleiki var prófaður í bókasafninu, gamlir tölvuleikir í Byggðasafninu og tónlistin var í fyrirrúmi í Hafnarborg.
