Miklu meiri snjór er á götum Hafnarfjarðar í dag en í gær og mun taka langan tíma að ryðja allar götur.
Í Klukkuberginu er ófært fyrir minni bíla og hafa fjölmargir verið í vandræðum þar í morgun. Hefur ekki verið svona mikill snjór þar í fjölmörg ár þó gatan hafi verið þekkt fyrir snjóþunga hér á árum áður.
Að sögn Guðjóns Steinars Sverrissonar, verkstjóra hjá Hafnarfjarðarbæ, eru öll tæki úti en eitthverjar bilanir urðu á tækjum eftir gærdaginn. Sagði hann mannskapinn hafa verið í mikilli vinnu í gær og álagið því mikið núna. Tæki sem venjulega fara götur eins og Klukkubergið, ráða ekki við það snjómagn sem þar er og þarf að senda stærri tæki og öflugri og því mun snjómoksturinn taka lengri tíma.
Fólk er hvatt til að vera ekki að reyna að fara í snjóþungar götur á smábílum en fastir bílar geta hindrað að hægt sé að ryðja göturnar.
Fjölmargir voru úti með skóflur í morgun og eflaust má telja það ágætis líkamsrækt að hreinsa gangstéttar við heimili með skóflu og snjósköfu.
