„Síðastliðið ár hef ég unnið að skemmtilegu og mjög áhugaverðu verkefni hjá lögreglunni á höfuðborgarsvæðinu. Þetta er tilraunaverkefni unnið í samvinnu með Hafnarfjarðarbæ sem snýr að því að skoða hvernig lögreglan á höfuðborgarsvæðinu getur á sem bestan og skilvirkastan máta komið að forvörnum, í víðum skilningi þess hugtaks,“ segir Biggi lögga, norðlenski Hafnfirðingurinn Birgir Örn Guðjónsson lögreglumaður í pósti á Facebook síðu sinni.
„Verkefnið hefur mælst ótrúlega vel fyrir og það er augljóst að aukin vinna lögreglu á þessu sviði er gífurlega mikilvæg. Aukin samvinna er lykillinn í þessari vinnu. Betur sjá augu en auga og sýn misjafnra aðila og stofnanna sem koma að þessum málum er ólík. Með því að þétta möskvana minnka líkurnar á mistökum eða að einstaklingar detti á milli í kerfinu. Þessi vinna hefur vakið athygli bæði innanlands og utan og fólk var spennt fyrir framtíðinni. Við höfum fengið mikið að fyrirspurnum og beiðnum um áframhaldandi vinnu og samstarf.
Núna í vikunni fékk ég samt þær ömurlegu fréttir að sökum niðurskurðarkröfu á lögregluna á höfuðborgarsvæðinu myndi þessi vinna ekki halda áfram að öllu óbreyttu.”
Trúði varla mínum eigin eyrum
„Ég trúði varla mínum eigin eyrum,“ segir Biggi. En þegar það er varla hægt að halda uppi grunn löggæslu sökum fjárskorts sé erfitt að fara út í ný verkefni sem kosta pening, jafnvel þó svo að samfélagslegur sparnaður á slíku verkefni sé augljós.
„Sigríður Björk, lögreglustjóri, kom þessu verkefni á laggirnar. Hún fór á sínum tíma af stað með nýja nálgun í heimilisofbeldismálum, sem er eitt risa forvarnarverkefni, og þetta var í raun næsta skref í þeirri vinnu. Að vernda þá sérstaklega sem eru í viðkvæmustu stöðunni og þar eru börn og ungmenni stærsti hópurinn. Það er skylda okkar sem samfélag að gera allt sem við getum í þeirri vinnu.“
Segist hann enga ástæðu til að fela þessa stöðu eða tala undir rós. Telur hann það gífurlega samfélagsleg mistök að láta alla þessa vinnu og þetta tækifæri fara forgörðum. Það fjármagn sem sett er í forvarnir skili sér margfalt til baka.
„Við vitum það! Hver einasti einstaklingur sem við náum að bjarga. Hver einasta fjölskylda sem við hjálpum. Hver einasta keðja ofbeldis, vanrækslu eða misnotkunar sem við náum að rjúfa. Þarna náum við að hafa áhrif og gera hluti sem skipta svo miklu máli. Það er vægast sagt stór undarlegt að vera í þessari stöðu á sama tíma og umræðan um ofbeldi meðal unglinga, vandamál með samfélagsmiðla, fíkniefni og annað slíkt tröll ríður fjölmiðlunum,“ segir Biggi lögga og er greinilega mikið niður fyrir.
Neyðarkall til stjórnvalda
Hann vill því koma með neyðarkall til stjórnvalda um að þau sjái til þess að þessu mikilvæga starfi verði fundið fjármagn svo við getum haldið áfram þessari vinnu sem við höfum hafið. Segist hann ekki trúa öðru en að það sé vilji til þess.
„Ég vil líka koma með ákall til allra ykkar sem hafa trú á forvarnarstarfi. Hjálpið að þrýsta á,“ segir Biggi og bendir á að við séum með verkfærin fyrir framan okkur og tilbúin að beita þeim.
„Við erum að reyna en það er erfitt þegar allir vilja taka þátt en enginn vill borga. Það er sorglegur sannleikur. Við borgum nefnilega öll margfalt meira á seinni stigum ef við gerum ekkert núna. Skammsýni er dýrkeypt í þessum málum.“
Segir Biggi að við séum á krossgötum í þessari vegferð. Það lítur út fyrir að sú vinna sem lögð hafi verið í að móta forvarnir hjá lögreglunni á höfuðborgarsvæðinu muni koma á ákveðna endastöð í lok maí.
„Á í alvörunni að leyfa því að gerast? Ég vil ekki trúa því. Slíkt væri glapræði,“ segir Biggi lögga í skeleggum pistli á síðu sinni.
Mikil ánægja í Hafnarfirði
Mikil ánægja hefur verið með þetta verkefni sem kallast Þorpið en það vísar til þess að það þarf oft heilt þorp til að ala upp barn.
Segir Geir Bjarnason, íþrótta- og æskulýðsfulltrúi að Biggi hafi unnið ómetanlegt starf í þessu verkefni. Hann hafi unnið að alls konar málum sem starfsfólk bæjarins hafi ekki haft neina burði til að sinna. Hann hafi stytt vegalengdir í ýmsum málum, miðlað mikilvægum upplýsingum í barnaverndarmálum og komið að ofbeldismálum með sérþekkingu sinni.
Segir Geir hann hafa unnið með krökkunum á jafnréttisgrunni, þau treysti honum og hann hafi verið „góða löggan“.
Við viljum hafa svona lögreglu
„Við viljum hafa svona lögreglu,“ segir Geir og segir mikilvægt að hafa lögreglu sem hægt sé að tala við og ræða vandamálin við. Telur hann lögregluna í dag vera yfirhlaðna verkefnum og geti því ekki sinnt þeim málum sem Biggi hafi unnið í þessu verkefni. Því sé mjög mikilvægt að halda því áfram.
Lýðheilsustofnun studdi þetta 14 mánaða verkefni um 5 milljónir kr. og lögreglan á höfuðborgarsvæðinu lagði til eitt stöðugildi.
Kom á óvart
Biggi lögga segir ákvörðunina hafa komið sér á óvart þegar hann fékk fréttir af henni í vikunni en hann segir að staðan verði lögð niður fáist ekki meira fjármagn til lögreglunnar vegna þessa starfs.
Segir hann upphaflega að markmiðið hafi verið að tilraunaverkefnið ætti að nýta til að móta svona starf um allt höfuðborgarsvæðið, hvernig samvinnu við hinar ýmsu stofnanir væri háttað og hvernig ætti að vinna þessi mál í framtíðinni.
Aðpurður segir hann að mörg þau mál sem hann hafi unnið með hefðu hvort eð er lent í höndum lögreglu og félagsmálayfirvalda svo sparnaðurinn væri mjög óljós.
