Ný Ástjarnarkirkja var vígð sl. sunnudag við hátíðlega athöfn. Reyndar er þetta aðeins fyrri hluti byggingaráforma sóknarnefndar en á að duga sókninni fyrst um sinn. Biskup Íslands, Agnes M. Sigurðardóttir leiddi athöfnina en naut aðstoðar sr. Þórhildar Ólafs prófasts Kjalarnessprófastsdæmis og sr. Kjartans Jónssonar sóknarprests.
Athöfnin hófst með því að sóknarnefnd, prestur, biskup og fleiri gengu í skrúðgöngu inn og fremstur fór formaður sóknarnefndar með kross en kirkjumunir voru bornir inn og lagðir á altarið.
Ástjarnarsókn var stofnuð í október 2001 sem tilraunaverkefni en sóknin verður með stærstu sóknum landsins á næstu árum.
Fyrstu árin fékk Ástjarnarkirkja inni á Ásvöllum og svo eftir að sóknin fékk úthlutað lóð að Kirkjuvöllum 1 og tveimur gömlum kennslustofum frá Hafnarfjarðarbæ árið 2006 voru athafnir þar en stærri athafnir áfram á Ásvöllum.
Árið 2013 hófst undirbúningur að byggingu kirkju og var síðar haldin hönnunarsamkeppni á safnaðarheimili þar sem gert væri ráð fyrir kirkjuskipi á síðari stigum. Teiknistofan Arkís var svo fengin til að hanna safnaðarheimilið og gengið til samninga við Teiknistofuna Óðinstorgi um verkfræðihönnun. í ágúst 2015 hófst jarðvinna og í nóvember var samið við SÞ verktaka um byggingu safnaðarheimilisins sem tekið var svo í notkun tveimur árum seinna og fyrsta guðsþjónustan var haldin í húsinu 20. ágúst.
Fjármögnun verkefnisins hefur verið nokkuð strembin og ekki er útlit fyrir að hægt veri að ráðast í byggingu kirkjuskipsins á næstu árum. Hafnarfjarðarbær leigir húsnæðið undir skólastarf Skarðshlíðarskóla fyrsta starfsár skólans en Geir Jónsson formaður sóknarnefndar upplýsti að töluvert minna hafi komið út úr samningi við Hafnarfjarðarbær um leiguna en vonir stóðu til. Hafði sóknin gert sér vonir um svipaðan meðaltals stuðning og bærinn hefur veitt öðrum kirkjum í Hafnarfirði í gegnum árin. Hafnarfjarðarbær kostar gerð bílastæða sem einnig eru opin fyrir aðra notkun.
Sagði Geir að nú væri verkefni sóknarnefndar að afla tekna til að ljúka því sem út af stendur. „Það er einlæg von okkar sem að þessu hafa komið að þetta hús muni þjóna hverfinu okkar sem kirkja næstu árin og einnig sem menningarhús, undir fjölbreytta starfsemi,“ sagði Geir að lokum.
Safnaðarheimilið, sem verður nú kallað kirkja, er um 800 m² að stærð með fjölnota sal, skrifstofur, eldhús, fundarherbergi auk snyrtinga og geymslu. Húsið er hið glæsilegasta, greinilega vel til vandað og hagkvæmni í fyrirrúmi. Stóra salnum má skipta niður í minni sali. Stór gluggahlið snýr út að fallegu hrauninu og bak við altarið er stór gluggaveggur að lokuðum altarisgarði.
Greinin birtist í 36. tbl. Fjarðarfrétta 12. október 2017
