Lóðin Mógrafaraás 6 í Áslandi 4 nær inn yfir skráðar minjar, áberandi stríðsminjar. Ef deiliskipulag af svæðinu sem samþykkt var í bæjarstjórn 4. maí 2022 er skoðað er ekki að finna neinar minjar á svæðinu.
Fjórar minjar er þó að finna á kortavef bæjarins og vekur upp spurningar hvers vegna þær séu ekki merktar inn á nýtt skipulag af svæðinu.
Stutt er síðan Fjarðarfréttir greindi frá því að minjar hafi verið eyðilagðar í Hamraneshverfinu, skráðar minjar sem Minjastofnun hafi sérstaklega bent á við breytingu á aðalskipulagi vegna breytinga í hverfinu.
Sigurður Haraldsson, sviðsstjóri hjá Hafnarfjarðarbær sagði í svari við fyrirspurn Fjarðarfrétta að þar á bæ hafi verið tekið eftir að lóðin næði inn á minjar og skipulagshöfundar hafi verið beðnir um að skoða þetta og breyta.
Skoða má skráðar minjar (flestar) á map.is/hafnarfjordur og velja þarf „Fornleifar“ sem er undir „Skipulag“. Til að sjá götur og lóðir þarf að velja „Lóðarmörk“ og „Byggingarreitir“ undir „Fasteignir“ og „Götur“ undir „Samgöngur og framkvæmdir“
