Skóhöllin í Firði skiptir um eigendur nú um mánaðarmótin er hjónin Anna Þórisdóttir og Davíð Hreinsson taka við rekstri þessarar 16 ára gömlu skóbúðar.
Þau taka við af hjónunum Vigdísi Grétarsdóttur og Helga Rúnari Gunnarssyni en um daglegan rekstur sá Vigdís um.
Það verður Anna sem sér um daglegan rekstur í framtíðinni en þau hjón segjast ætla að halda í það góða sem fyrri eigendur hafa mótað, að eiga skó á alla fjölskylduna. Eðlilega verða þó áherslubreytingar, ný merki og vörur koma inn og innréttingar verða endurnýjaðar. Segjast þau hlakka til starfans og horfa til langrar framtíðar með skóbúðina í Firði þar sem svo góður andi ríkir.
