Nýlega var opnaður nýr Kebab veitingastaður á fyrstu hæðinni í Firði með nafninu Kebab Fjörður.
Eigandinn er Sigríður Þráinsdóttir, sem er Reykvíkingur en sá gullið tækifæri til að skapa sér góðan starfsvettvang. Hún segir að hún hafi sérfrótt fólk sér við hlið við að þróa staðinn en hún segir viðtökurnar hafi strax verið mjög góðar, þó rólega hafi verið farið af stað.
Veitingastaðurinn er í vesturenda Fjarðar þar sem hamborgarastaður var áður. Hefur húsnæðið verið tekið í gegn og vel tekist til.
Matseðillinn er fjölbreyttur og mun þróast með tímanum að sögn Sigríðar en allir réttir kosta í dag undir 2.000 kr. Segir hún að búast megi við nýjungum strax alveg á næstunni.
Blaðamaður sannreyndi að maturinn er afbragðs góður, allt efni ferskt og kjötið alveg ný eldað.
Er staðurinn enn einn staður í glæsta veitingahúsaflóruna í Hafnarfirði.
