Fulltrúar Miðflokks, Bæjarlista og Samfylkingar lögðu til á bæjarráðsfundi í síðustu viku að útsvarsprósenta við álagningu 2021 verði 14,52% sem er hámarksheimild til innheimtu útsvars.
Kom fram í greinargerð að fullnýting útsvarsprósentuna (14,52%) hefði þýtt kostnaðarauka fyrir einstakling með eina milljón kr. á mánuði í laun um 400 krónur á mánuði. Kostnaðarauki einstaklings með 500 þúsund kr. á mánuði yrði 200 kr.
Sveitarfélagið muni hins vegar um þennan mismun á útsvari 14,52%/14,48% um 50 milljónir á ári sem er upphæð sem sveitarfélagið sárvantar.
Var tillagan felld með þremur atkvæðum Framsóknar og Sjálfstæðisflokks en fulltrúar Miðflokks og Samfylkingar greiddu atkvæði með tillögunni.
Tillaga um óbreytta útsvarsprósentu var samþykkt en fulltrúar Samfylkingar og Miðflokks greiddu atkvæði á móti og í bókun flokkanna sagði að nú væri ljóst að meirihluti Sjálfstæðis- og Framsóknarflokks ætli sér ekki að fullnýta útsvarið. Hann ákveði þess í stað að hækka gjaldskrár.
Fulltrúi Viðreisnar óskaði formlega eftir því að gerðar yrðu nokkrar sviðsmyndir þar sem sýnt yrði hvernig allar fyrirhugaðar gjaldskrárhækkanir birtust við ólíkar stærðir fjölskyldna. Taldi fulltrúi Viðreisnar það nauðsýnlegt til að geta tekið upplýsta ákvörðun um það hvernig heildar hækkanir koma við heimilin í Hafnarfirði.
Sagði fulltrúi Miðflokks það vera hreina og klára sýndarmennsku meirihluta Sjálfstæðisflokks og Framsóknarflokks að viðhalda útsvarsprósentu sveitarfélagsins óbreyttri í ljósi erfiðrar rekstrarstöðu bæjarins. Vandanum hafi verið mætt m.a. með sölu fyrirtækja bæjarins, hækkun gjaldskrár og fleiru.
Fulltrúi Bæjarlista lýsti furðu á því vali meirihlutans að nýta ekki útsvarsheimildir til fulls, til ráðstöfunar í þjónustu við viðkvæma hópa.
Vilja ekki hækka álögur á íbúa með hækkun útsvars en hækka gjaldskrár
Fulltrúar Sjálfstæðisflokks og Framsóknar segja m.a. í bókun á síðasta bæjarráðsfundi:
„Það hefur verið ein af áherslum núverandi meirihluta að hækka ekki álögur á íbúa. Útsvarshækkun hefði í för með sér tekjuskerðingu fyrir bæjarbúa eða með öðrum orðum; útborguð laun íbúa bæjarfélagsins lækka.“
Bæjarstjórn samþykkti óbreytt útsvar
Töluverð umræða varð um málið á bæjarstjórnar og blandaði Ólafur Ingi Tómasson landsþingi Miðflokksins inn í umræðuna.
Var mikið bókað um málið en að lokum var niðurstaða bæjarráðs um óbeytta útsvarsprósentu samþykkt með atkvæðum Framsóknar, Sjálfstæðisflokks og Viðreisnar.
