Bæjarstjórn ákvað á fundi sínum í dag að fresta tillögu fulltrúa Samfylkingar og Vinstri um að bæjarstjórn Hafnarfjarðar samþykki að launahækkanir samkvæmt úrskurði Kjararáðs þann 1. nóvember sl. muni ekki hafa áhrif á launakjör bæjarfulltrúa í Hafnarfirði og áfram verði miðað við þau launakjör sem í gildi voru fyrir umdeilda ákvörðun kjararáðs.
Í rökstuðningi sögðu tillöguflytjendur: „Við teljum að algjör forsendubrestur hafi orðið í samþykkt um launakjör bæjarfulltrúa í Hafnarfirði með úrskurði Kjararáðs. Laun bæjarfulltrúa hafa tekið breytingum í samræmi við almenna launaþróun og óhóflegar hækkanir líkt og Kjararáð hefur nú úrskurðað um getum við ekki gengist undir.“
Höfðu þeir lagt samsskonar tillögu fram í bæjarráði í síðustu viku en þá var afgreiðslu frestað til næsta fundar bæjarráð með atkvæðum fulltrúa Sjálfstæðisflokks og Bjartrar framtíðar.
Ekki vildu fulltrúar Sjálfstæðisflokks og Bjartrar framtíðar heldur afgreiða tillöguna í bæjarstjórn og lögðu fram tillögu um frestum málsins sem samþykkt var með 7 atkvæðum gegn 4.
Bókun Samfylkingar og Vinstri grænna
„Fulltrúar Samfylkingar og Vinstri grænna lýsa vonbrigðum með þá ákvörðun fulltrúa Sjálfstæðisflokks og Bjartrar framtíðar að hafa nú frestað í tvígang tillögu okkar um að launahækkanir samkvæmt úrskurði kjararáðs hafi ekki áhrif á launakjör bæjarfulltrúa í Hafnarfirði. Það eru kaldar kveðjur til almennra launþega sem ekki hafa fengið viðlíka hækkanir á sínum launakjörum.“
Bækun Sjálfstæðisflokks og Bjartrar framtíðar
„Laun kjörinna fulltrúa í Hafnarfirði eiga að vera sambærileg við það sem gerist meðal kjörinna fulltrúa í öðrum sveitarfélögum, fylgja leiðbeinandi tilmælum frá stjórn Sambands íslenskra sveitarfélaga og launaþróun á vinnumarkaði almennt. Í ljósi nýlegrar ákvörðunar kjararáðs telja bæjarfulltrúar Sjálfstæðisflokks og Bjartrar framtíðar brýnt að Alþingi endurskoði lög um kjararáð og ákvörðun ráðsins sem um ræðir.“
Segir Guðlaug Kristjánsdóttir, forseti bæjarstjórnar og oddviti Bjartrar framtíðar samt í Facebook færslu í kvöld: „Þessi framkvæmd kjararáðs er fullkomlega úr takti.“
Bæjarstjórn Hafnarfjarðar hefur því ekki enn tekið afstöðu til þess hvort eðlilegt sé að hækka laun kjörinna fulltrúa um 44,3% þrátt fyrir nýlega samþykkt um nýtt viðmið þar sem alls ekki átti að breyta launum.
Frétt Fjarðarfrétta frá 4. nóvember um hækkun launa
