Bæjarstjórn felldi rétt í þessu frávísunartillögu á afgreiðslu á ákvörðun bæjarráðs um sölu á hlut í HS veitum. Guðlaug Svala Steinunnar Kristjánsdóttir sagði í kynningu á tillögunni að skv. sveitarstjórnarlögum þyrfti bæjarstjórn að taka ákvörðun um sölu á veigamiklum hlutum í eigu sveitarfélags og ekkert kæmi fram í samþykktum bæjarins að bæjarráð væri heimilt að taka slíkar ákvarðanir nema í sumarfríi sveitarstjórnar. Sagði hún að allt ferlið hefði farið fram í bæjarráði og ákvörðun hefði verið tekin að selja og að taka tilboði í hlutinn en ákvörðuninni væri vísað til staðfestingar bæjarstjórnar. Sagði hún að bæjarstjórn hafi á engum tímapunkti tekið málið til umfjöllunar og því væri þessi frávísunartillaga lögð fram.
Var tillagan felld með 6 atkvæðum fulltrúa Sjálfstæðisflokks og Framsóknar gegn 5 atkvæðum fulltrúa, Samfylkingar, Bæjarlista, Miðflokks og Viðreisnar.
