Á fundi sínum 6. október sl. samþykkti bæjarráð að breyta viðmiðunarupphæð launa kjörinna fulltrúa Hafnarfjarðar. Í stað þess að ákveða sjálf viðmiðunarupphæðina sem var 604.909 kr. var ákveðið að miða við þingfararkaup sem var 762.940 kr.
Tryggt var að þetta breytti ekki upphæð launa kjörinna fulltrúa en laun bæjarfulltrúa urðu 26,165% af þingfararkaupi.
Laun kjörinna fulltrúa eru nú:
- Bæjarfulltrúi: 199.620,-
- Forseti bæjarstjórnar 299.460,-
- Formaður bæjarráðs 362.945,- (199.620 + 163.325)
- Bæjarráðsmaður 308.504,- (199.620 + 108.884)
- Formaður ráðs 335.725,- (199.620 + 136.105)
Sitji menn í nefndum og ráðum öðrum en sem hér hafa verið nefndar að ofan fá menn aukalega greitt fyrir það.
- Alm. ráðsmaður 90.736,-
- Formaður hafnarstjórnar 99.810,-
- Hafnarstjórnarmaður 55.540,-
Þá fá varamenn í bæjarstjórn og bæjarráði 24.196 kr. fyrir hvern fund, fyrstu 4 klst.
Sjá má launatöfluna hér.
Hækka launin sjálfkrafa?
Sé ekkert annað ákveðið hækka laun bæjarfulltrúa um 44,3% við úrskurð kjararáðs um að hækka laun forseta Íslands, þingmanna og ráðherra. Kjararáð úrskurðaði að þingfararkaup verði 1.101.194 kr. á mánuði frá og með 30. október 2016.
Í kjararáði sitja 5 fulltrúar. Þrír kosnir af Alþingi, einn skipaður af Hæstarétti og einn skipaður af fjármála- og efnahagsráðherra. Formaður Kjararáðs er Jónas Þór Guðmundsson hæstaréttarlögmaður í Hafnarfirði og formaður kjördæmisráðs Sjálfstæðisflokksins í suðvesturkjördæmi og fulltrúi þess í miðstjórn flokksins.
Hver yrðu launin?
Samþykki bæjarráð ekki annað verða laun oddvita flokkanna eftirfarandi:
- Guðlaug Kristjánsdóttir 785.790,- (forseti bæjarstjórnar, í bæjarráði og formaður fræðsluráðs)
- Rósa Guðbjartsdóttir 720.795,- (formaður bæjarráðs og fræðsluráðs)
- Sverrir Garðarsson 419.092,- (bæjarfulltrúi, í fræðsluráði)*
- Gunnar Axel Axelsson 288.127,- (bæjarfulltrúi)
Uppfært: *Sverrir Garðarsson fær full laun sem áheyrnarfulltrúi í bæjarráði og bætast því 108.884 kr. við launin. Fær hann því í heild 527.976 kr. á mánuði.
Væri Guðlaug að fá 241 þús. kr. hækkun og Rós 222 þús. kr. hækkun. Til viðbótar geta bæjarfulltrúar verið að fá greiðslur fyrir setu í stjórnum utan Hafnarfjarðar s.s. í stjórn Sorpu, í fulltrúaráði Samtaka sveitarfélaga á höfuðborgarsvæðinu og víðar.
40 milljón kr. útgjaldaauki
Áætla má m.v. að launakostnaður Hafnarfjarðarbæjar vegna kjörinna fulltrúa og nefndarmanna fyrstu 10 mánuði ársins er 80,3 milljónir kr. að útgjaldaaukinn sem yrði vegna hækkunarinn næmi um a.m.k. 40 milljón krónum á ári.
Gagnlegt að fara yfir málin og gera samanburð á launaþróun
„Þessar breytingar kjararáðs sem nú hafa verið tilkynntar hafa ekki komið til umræðu í okkar hópi ennþá en ég held það gæti verið gagnlegt fyrsta skref að fara yfir málin og gera samanburð á launaþróun kjörinna fulltrúa og annarra undanfarin ár,“ segir Rósa Guðbjartsdóttir formaður bæjarráðs í svari við fyrirspurn Fjarðarfrétta um viðbrögð við úrskurð kjararáðs.
Segir hún að það hafi verið ákveðið í júlí sl., að miða við þingfararkaup í kjölfar þess að Samband íslenskra sveitarfélaga birti nýja viðmiðunartöflu um laun kjörinna fulltrúa þar sem mælst var til að sveitarfélögin myndu öll taka mið af þingfararkaupinu. Segir hún flest sveitarfélög landsins gera það.
„Fulltrúar sambandsins mættu á fund bæjarráðs þann 14. júlí sl. þar sem viðmiðunartaflan var kynnt og lögð fram. Í Hafnarfirði var ákveðið að fara að þeim tilmælum og tillaga forsetanefndar var samþykkt um að starfshlutfalli kjörinna fulltrúa yrði breytt lítillega til að tenging við þingfararkaupið kæmi ekki til hækkunar,“ segir Rósa.
Borgarstjórinn í Reykjavík vill ekki hækka
Dagur B. Eggertsson, borgarstjóri Reykjavíkur, hefur skorað á alla þingmenn að grípa inn í úrskurð kjararáðs. Segir hann að samstarf stjórnvalda og verkalýðshreyfingar um þróun kjaramála sé í fullkomnu uppnámi verði ekkert að gert.
Borgarstjóri hefur auk þess farið þess á leit við skrifstofustjóra skrifstofu borgarstjórnar að laun kjörinna fulltrúa í borgarstjórn, að honum meðtöldum, hækki ekki í samræmi við úrskurðinn frá 1. nóvember. Grunnlaun borgarfulltrúa eru 80% af þingfararkaupi en rúm 26% í Hafnarfirði.
Afgreiðslu bæjarráðs á tillögu um að laun hækki ekki frestað til næsta fundar
Á fundi bæjarráðs í gær lögðu fulltrúar Samfylkingar og Vinstri grænna leggja fram svohljóðandi tillögu:
Fulltrúar Samfylkingar og Vinstri grænna telja að algjör forsendubrestur hafi orðið í samþykkt um launakjör bæjarfulltrúa í Hafnarfirði með úrskurði Kjararáðs. Það var sameiginleg tillaga forsetanefndar þann 30. september sl. og samþykkt af bæjarráði þann 6. október að hlutfall af þingfararkaupi yrði útfært á þann veg að ekki leiddi til launahækkanna. Laun bæjarfulltrúa hafa tekið breytingum í samræmi við almenna launaþróun og óhóflegar hækkanir líkt og Kjararáð hefur nú úrskurðað um getum við ekki gengist undir. Því leggjum við til að bæjarráð staðfesti að launahækkanir samkvæmt úrskurði Kjararáðs þann 1. nóvember muni ekki hafa áhrif á launakjör bæjarfulltrúa í Hafnarfirði.
Afgreiðslu tillögunnar var frestað til næsta fundar bæjaráðs en ráðið fundar að jafnaði annan hvern fimmtudag.
