Bæjarráð Hafnarfjarðar tók fyrir á fundi sínum í gær gjaldskrárbreytingar vegna yfirstandandi kjarasamninga.
Ver málefnið til umræðu að ósk Samfylkingar sem lögðu fram svohljóðandi tillögu:
„Bæjarráð Hafnarfjarðar samþykkir að leggja sitt að mörkum til að tryggja gerð kjarasamninga með eftirfarandi hætti og markmiði; með því að stuðla að hóflegum launahækkunum, sem og lækkun verðbólgu og vaxta í samfélaginu, með því að almennar gjaldskrár bæjarins verði lækkaðar, þannig að hækkun þeirra á árinu 2024 verði 3,5%. Ennfremur skuldbindur sveitarfélagið sig til að taka þátt í því verkefni að tryggja gjaldfrjálsar skólamáltíðir fyrir nemendur í grunnskólum í Hafnarfirði í samstarf við ríkisvaldið og með fyrirliggjandi kostnaðarþátttöku þess. Þessar aðgerðir taka mið af heildarniðurstöðu kjarasamninga.“
Efnislega er þarna verið að leggja til að gjaldskrárhækkanir verði hámark 3,5% og að skólamáltíðir í grunnskólum verði fríar með fyrirliggjandi kostnaðarþátttöku ríkisins, 75%.
Þegar tillagan hafði verið lögð fram kl. 10:12 var gert fundarhlé og var fundi svo framhaldið kl. 11:48.
En þá lagði formaður bæjarráðs til að fundi yrði frestað til kl. 17. Var það samþykkt. Skv. upplýsingum Fjarðarfrétta var það gert svo fólk gæti betur áttað sig á stöðunni, skilaboð voru að berast frá ríkisvaldinu og verkalýðshreyfingunni.
Þegar fundi var framhaldið kl. 17 lögðu fulltrúar Framsóknar og Sjálfstæðisflokks fram svohljóðandi tillögu:
„Bæjarráð Hafnarfjarðar samþykkir að leggja sitt að mörkum til að greiða fyrir gerð kjarasamninga til 4 ára sem miða að því að ná niður verðbólgu og vaxtastigi. Hafnarfjaðarbær telur að hófsamir kjarasamningar með þessu markmiði feli í sér miklar kjarabætur fyrir alla íbúa. Hafnarfjarðarbær er því tilbúin að taka þátt í yfirlýsingu ríkis og sveitarfélaga sem felur í sér að Hafnarfjarðarbær haldi aftur af hækkun gjaldskráa sem snúa að börnum og barnafjölskyldum. Ennfremur tekur bærinn þátt í því verkefni að skólamáltíðir í grunnskólum verði gjaldfrjálsar með 75% greiðsluþátttöku ríkisins út samningstímabilið.“
Það vekur athygli að ekki er gerð breytingartillaga við tillögu fulltrúa Samfylkingar í bæjarráði heldur er lögð fram ný tillaga sem í raun segir það sama að bærinn bjóði upp á fríar skólamáltíðir með kostnaðarþátttöku ríkisins en áherslumunur er á tillögu um gjaldskrárhækkanir þar sem sagt er að að Hafnarfjarðarbær haldi aftur af hækkun gjaldskráa sem snúa að börnum og barnafjölskyldum án þess að fram komi hver hækkunin verði og nákvæmlega hvaða gjaldskrár er átt við.
Aftur var gert fundarhlé sem nú var þó aðeins 7 mínútna langt.
Þá var tillaga Samfylkingar borin upp til atkvæða.
Var hún felld á jöfnum atkvæðum þar sem tveir fulltrúar Samfylkingar greiddu atkvæði með tillögunni en tveir fulltrúar Sjálfstæðisflokks greiddu atkvæði gegn tillögunni.
Formaður bæjarráðs sat hjá
Athygli vakti að fulltrúi Framsóknarflokks og verðandi bæjarstjóri sat hjá við afgreiðslu tillögunnar og sagði hann í samtali við Fjarðarfréttir að það hafi hann gert þar sem tillagan var í raun efnislega eins og tillag fulltrúa meirihlutaflokkanna hafi verið hófstilltari.
Því næst er tillaga fulltrúa Framsóknar og Sjálfstæðisflokks borin upp til atkvæða og var hún samþykkt samhljóða.
Æskilegra hefði verið að horfa t.d. til ótengdra barnabóta
Í bókun oddvita Sjálfstæðisflokks og bæjarstjóra Rósu Guðbjartsdóttur segir að hún styðji aðgerðir sem stuðli að og tryggja gerð hagstæðra langtíma kjarasamninga. Rósa var hins vegar ekki með atkvæðisrétt á fundinum.
„Meðal annars hefur bæjarstjórn Hafnarfjarðar lýst því ítrekað yfir að gjaldskrárhækkanir yrðu endurskoðaðar gefi niðurstaða kjarasamninga tilefni til. Undirrituð styður aðrar þær kjarabætur sem ríkisvaldið hefur kynnt sem stuðning stjórnvalda vegna kjarasamninga en leggur áherslu á að leitað yrði annarra leiða við að útfæra markmið um gjaldfrjálsar skólamáltíðir en beint í gegnum gjaldskrár sveitarfélaga í því skyni að standa vörð um sjálfsákvörðunarrétt sveitarfélaga. Sveitarfélög í landinu hafa flest verið reiðubúin til samtals um málið á breiðum grundvelli með það að leiðarljósi að tryggja millitekjuhópum og tekjulágum kjarabætur og velferð. Undirrituð bendir á að æskilegra hefði verið að horfa t.d. til ótengdra barnabóta og einnig til fjölskyldna sem eru með börn á leikskólaaldri.“
Óska eftir kostnaðar- og ábatagreiningu
Jón Ingi Hákonarson, áheyrnarfulltrúi Viðreisnar í bæjarráð fagnaði því í bókun að Hafnarfjarðarbær muni taka þátt í þeirri vinnu að lækka vexti og verðbólgu og styðji tillöguna.
„Enda hefur fulltrúi Viðreisnar talað fyrir hófsömum hækkunum gjaldskrár bæjarins þar sem lækkun vaxta og verðbólgu er bæjarsjóði mikilvægara heldur en óhófleg hækkun gjaldskrár. Einnig óskar fulltrúi Viðreisnar eftir kostnaðar- og ábatagreiningu á hugmyndum breiðfylkingarinnar á leiðréttingu á gjaldskrá bæjarins niður í 3,5% og þátttöku í gjaldfrjálsum skólamáltíðum. Hvaða áhrif mun þetta hafa á fjármagnskostnað bæjarins með væntri lækkun verðbólgu og vaxta?“
Fulltrúar Samfylkingarinnar leggja fram eftirfarandi bókun:
Fagna sinnaskiptum Sjálfstæðisflokksins
Fulltrúar Samfylkingarinnar fagnaði í bókun sinni sinnaskiptum Sjálfstæðisflokksins frá fundi bæjarráð fyrr um morguninn, þar sem þeir lögðust gegn gjaldfrjálsum máltíðum í grunnskólum að þeirra sögn.
„Þeir hafa nú lagt niður andstöðu sína, enda hér um að ræða mikið hagsmunamál fyrir ungmenni í bænum og foreldra og forráðamenn þeirra. Bókun bæjarstjóra hér að framan undirstrikar þó þá staðreynd að Sjálfstæðisflokkurinn styður málið með hangandi hendi og án sannfæringar. Þessi tillaga meirihlutans er efnislega fullkomlega samhljóða tillögu jafnaðarmanna sem var lögð fram í morgun. En mestu skiptir að þetta hagsmunamál er í höfn. Eins er það fagnaðarefni að kjarasamningar náist á vinnumarkaði og þar þurfa sveitarfélög að leggja sitt af mörkum hvað varðar hófstilltar álögur. Lækkun úr 9,9% í Hafnarfirði hvað varðar gjaldskrár sveitarfélagsins í 3,5% er grunnforsenda í þeim efnum. Jafnaðarmenn munu fylgjast grannt með því að við þessi fyrirheit meirihlutans verði staðið.“
Lítur trúnaðarbrest oddvita Samfylkingar alvarlegum augum
Bæjarstjóri, Rósa Guðbjartsdóttir kom svo að lokum að annarri bókun:
„Bæjarstjóri andmælir því að Samfylkingin leggi bæjarráðsfulltrúum orð í munn og túlki eftir eigin höfði skoðanir annarra í bæjarráði. Einnig er trúnaðarbrestur oddvita Samfylkingarinnar gagnvart samskiptum við fjölmiðla áður en fundi er slitið, litinn alvarlegum augum.“
Segir fát hafi komið á meirihlutann
Vitnar Rósa í viðtal við Guðmund Árna Stefánsson við Heimildina í langa fundarhléinu í gær en þar segir hann að fát hafi komið á meirihluta Sjálfstæðisflokks og Framsóknar í bæjarráði Hafnarfjarðar þegar fulltrúar Samfylkingarinnar lögðu fram tillögu um að fallast á forsendur kjarasamninga sem verkalýðshreyfingin, aðilar vinnumarkaðarins og ríkisstjórnin hafa lagt upp með.
Guðmundur Árni sagði í viðtalinu að tillaga Samfylkingarinnar hafi falið í sér að lækka gjaldskrá sveitarfélagsins og að „taka í þessa útréttu hönd ríkisvaldsins og setja á gjaldfrjálsar máltíðir fyrir grunnskólabörn.“ Hann sagði hana hófstillta og í anda þess sem samþykkt var í Reykjavík í gærmorgun.
80 milljarða kr. stuðningur
Alls er metið að framlag ríkisins og sveitarfélaganna til að greiða fyrir kjarasamningum á vinnumarkaði til næstu fjögurra ára kosti um 80 milljarða kr. En í því felast fríar skólamáltíðir, hærri fæðingarorlofsgreiðslur, hækkun barnabóta, sérstakur vaxtastuðningur, aukinn stuðningur við leigjendur og hóflegar gjaldskrárhækkanir.
Aðgerðirnar styðja við sameiginlegt markmið stjórnvalda og samningsaðila um að leggja grundvöll að vaxandi velsæld, með auknum kaupmætti og stuðla að lækkun verðbólgu og vaxta.
Heildarumfang aðgerðanna er allt að 80 milljarðar króna á samningstímanum. Í þeim er lögð sérstök áhersla á að stuðla að heilbrigðari húsnæðismarkaði og fjölskylduvænna samfélagi samhliða því að stuðla að lækkun verðbólgu og vaxta. Aðgerðirnar munu auka ráðstöfunartekjur fjölskyldna verulega á samningstímanum, eða um allt að 500 þúsund krónur á ári.
