Sjálfstæðisflokkurinn í Hafnarfirði opnaði kosningaskrifstofu sína á Norðurbakka 1 sl. laugardag og kynnti áherslur flokksins fyrir komandi sveitarstjórnarkosningar undir formerkjunum Höldum áfram – fyrir Hafnarfjörð.
„Við leggjum stolt fram okkar verk og þann góða árangur sem náðst hefur í rekstri sveitarfélagsins á kjörtímabilinu. Við vonumst til að fá stuðning kjósenda til að halda áfram á sömu braut við að efla þjónustu sveitarfélagsins og lækka álögur og gjöld á bæjarbúa,“ segir Rósa Guðbjartsdóttir oddviti Sjálfstæðismanna í Hafnarfirði. „Það eru fjölmörg tækifæri til að efla bæinn enn frekar og byggja upp á ýmsum sviðum til framtíðar og mikilvægt að Sjálfstæðisflokkurinn fái áfram stuðning til að verða burðarafl í næstu bæjarstjórn eins og verið hefur.“
Helstu áherslur Sjálfstæðisflokksins í Hafnarfirði eru að:
- Tryggja að framkvæmdum verði lokið við tvöföldun Reykjanesbrautar og endurgerð gatnamóta við Setberg og Kaplakrika
- Halda áfram á braut ábyrgrar fjármálastjórnunar bæjarfélagsins
- Skipuleggja íbúðir með þjónustukjarna fyrir eldri borgara miðsvæðis á Völlum
- Endurbyggja Suðurbæjarlaug og stórbæta aðstöðu þar
- Lækka innritunaraldur barna í leikskóla úr 15 í 12 mánuði
- Skipuleggja litlar íbúðir/smáhýsi í Hamranesi og tryggja nægt lóðaframboð
- Halda áfram að lækka útsvar, fasteignaskatta og þjónustugjöld, með sérstakri áherslu á barnafjölskyldur
- Leggja áherslu á uppbyggingu búsetukjarna fyrir fatlaða
- Efla list-, og verkgreinar, nýsköpun og tækni í skólastarfi
- Hækka frístundastyrki og efla frístundaakstur
- Bæta aðstöðu til útivistar við Hvaleyrarvatn og Kaldársel
- Leggja áherslu á líðan barna í skólum og snemmtæka íhlutun
- Halda áfram að treysta fjárhag bæjarins og fjármagna framkvæmdir með eigin fé
Nánari upplýsingar um stefnu flokksins má finna á xdhafnarfjordur.is.
Efstu 6 á lista Sjálfstæðisflokksins eru:
- Rósa Guðbjartsdóttir, formaður bæjarráðs
- Kristinn Andersen, verkfr. og bæjarfulltrúi
- Ólafur Ingi Tómasson, bæjarfulltrúi
- Helga Ingólfsdóttir, bæjarfulltrúi
- Kristín Thoroddsen, varabæjarfulltr. og flugfreyja
- Guðbjörg Oddný Jónasdóttir, mannauðsstjóri
