Sjálfstæðismenn kusu nær óbreyttan lista 8 efstu

Nýir frambjóðendur nutu ekki brautargengis í prófkjöri Sjálfstæðisflokksins í Hafnarfirði sem haldið var í gær.

Alls kusu 876 í prófkjörinu, auðir seðlar og ógildir voru 27 og talin atkvæði voru því 849.

Eru þetta 35% færri en kusu í prófkjörinu 2014 en þess ber að geta að þá var líka barist um fyrsta sætið en nú sóttist Rósa ein eftir oddvitasætinu.

Alls buðu sig 14 fram í prófkjörinu en af nýliðum fékk aðeins Guðbjörg Oddný Jónasdóttir mannauðsstjóri kosningu í eitt af efstu 8 sætunum.

Rósa fékk 63% atkvæði í 1. sæti en bauð sig ein fram

Rósa Guðbjartsdóttir bauð sig ein fram í 1. sæti listans en fékk þó aðeins 63% atkvæði í fyrsta sætið sem hlýtur að vera vonbrigði. Í síðustu kosningum voru fjögur um hituna en þá fékk hún tæplega 46% atkvæða í 1. sætið og sigraði.

Unnur Lára tapaði miklu trausti

Unnur Lára Bryde bæjarfulltrúi, sem bauð sig fram í 2. sæti listans náði aðeins 7. sæti í prófkjörinu en hún náði 3. sætinu í síðasta prófkjöri. Unnur Lára er varamaður í bæjarráði, formaður hafnarstjórnar og fulltrúi í umhverfis- og framkvæmdaráði.

Kristinn sigraði í baráttunni um annað sætið

Það vakti nokkra athygli að fjórir berðust um 2. sætið sem Kristinn Andersen hefur setið í.
Kristinn virðist hafa sigrað þann slag nokkuð örugglega því Ingi Tómasson fékk aðeins tveimur atkvæðum meira í 1.-3. sætið og Helga Ingólfsdóttir fékk aðeins 27 atkvæðum meira í 1.-4. sætið. Þau eru því öll með örugga kosningu í sín sæti og röðin í fimm efstu sætin eru óbreytt frá því sem hún hefur verið fyrir utan fylgishrun Unnar Láru sem fellur úr 3. sæti í það 7. en við það flytjast þau Ingi, Helga og Kristín öll upp um eitt sæti.

Skarphéðinn Orri fellur um eitt sæti

Skarphéðinn Orri Björnsson varabæjarfulltrúi gaf kost á sér í 3.-5. sæti en hafnaði í 8. sæti sem er sæti neðar en hann var í.

Hamar, vefur Sjálfstæðisflokksins í Hafnarfirði hefur birt niðurstöðuna þar sem nöfn átta efstu eru birt og fjöldi atkvæða í hvert sæti. Aðeins var kosið í 6 sæti svo upplýsingar um þau sem lentu í 7. og 8. sæti geta vart verið réttar því enginn getur hafa kosið þau í þessi sæti. Líklegast er að þarna séu upplýsingar um heildaratkvæðafjölda þeirra í prófkjörinu. Ekki náðist í formann kjörnefndar til að fá þetta staðfest. – Uppfært 12.3.2018: Formaður kjörnefndar hefur staðfest að atkvæðafjöldinn í 7. og 8. sæti er heildaratkvæðafjöldi, þ.e. fjöldi atkvæða í 1.-6. sæti.

1. Rósa Guðbjartsdóttir  539 atkvæði í fyrsta sæti
2. Kristinn Andersen,  315 atkvæði í fyrsta til annað sæti
3. Ingi Tómasson, 317 atkvæði í fyrsta til þriðja sæti
4. Helga Ingólfsdóttir,  354 atkvæði í fyrsta til fjórða sæti
5. Kristín Thoroddsen,  344 atkvæði í fyrsta til fimmta sæti
6. Guðbjörg Oddný Jónasdóttir,  383 atkvæði í fyrsta til sjötta sæti
7. Unnur Lára Bryde,  362 atkvæði [í fyrsta til sjötta sæti]
8. Skarphéðinn Orri Björnsson,  349 atkvæði [í fyrsta til sjötta sæti]

Aðrir sem buðu sig fram en fengu ekki brautargengi:

Berg­ur Þorri Benja­míns­son, formaður Sjálfs­bjarg­ar
Ein­ar Freyr Bergs­son fram­halds­skóla­nemi
Eyrún Eyfjörð Svanþórs­dótt­ir fram­halds­skóla­nemi
Lovísa Björg Trausta­dótt­ir, iðnrekstr­ar­fræðing­ur og meist­ara­námsnemi
Magnús Ægir Magnús­son fjár­málaráðgjafi
Tinna Hall­bergs­dótt­ir, gæðafull­trúi Viðlaga­trygg­inga

Ummæli

Ummæli