Valdimar Víðisson, skólastjóri og varabæjarfulltrúi Sjálfstæðisflokksins hefur ákveðið að sækjast eftir einu af forystusætunum hjá Framsókn og óháðum fyrir komandi sveitarstjórnarkosningar.
„Á kjörtímabilinu sem nú er að líða hef ég verið varabæjarfulltrúi fyrir Sjálfstæðisflokkinn og setið í nefndum á hans vegum. Eftir mikla umhugsun og yfirlegu ákvað ég nýverið að segja mig frá öllum þeim störfum. Ég þakka félögum mínum í Sjálfstæðisflokknum fyrir gott og gefandi samstarf,“ segir Valdimar Víðisson.
„Ég tek þetta skref eftir að hafa átt samtöl við Ágúst Bjarna Garðarsson undanfarna mánuði. Samtöl okkar um sveitarstjórnarmál og komandi kosningar sýndi að við áttum sameiginlega sýn og höfðum sameiginlegan vilja til ná breiðari skírskotun og auka sátt almennt í bæjarfélaginu. Hér í Hafnarfirði eigum við að geta verið sammála um svo margt, sammála um að þjónusta íbúana vel og að kjörnir fulltrúar ræði betur saman þvert á flokka og nái góðri einingu um málefni og leiðir. Því teljum við vænlegt að auka breidd framboðsins og bjóða fram sem Framsókn og óháðir.
Reynsla mín og þekking sem stjórnanda tel ég að muni nýtast vel innan bæjarstjórnar Hafnarfjarðar.“
Valdmar segist hlakka til komandi mánaða og samtalsins við bæjarbúa.
