Hafnarfjarðarbær hefur tilkynnt að ráðist verði í átak vegna ökutækja án númera sem lagt er á gangstéttum, opnum svæðum, óbyggðum lóðum og stígum og hindrað geta sýn og skapað hættu eða ýta undir miður fallega ásýnd bæjarins.
Í 20. grein lögreglusamþykktar Hafnarfjarðarbæjar segir að Hafnarfjarðarbæ sé heimilt að fjarlægja ökutæki sem standa án skráningarnúmera á lóðum við almannafæri, götum og almennum bifreiðastæðum og ökutæki sem skilin eru eftir á opnum svæðum.
Í tilkynningunni segir að töluvert hafi borið á því að ökutæki án skráningarnúmera séu skilin eftir á opnum og almennum svæðum og að fjölmargar kvartanir þess efnis hafi borist sveitarfélaginu. Nær átakið sérstaklega til ákveðinna hverfa en fram kemur að þó megi finna slík ökutæki innan nær allra hverfa.
Tekið er á móti ábendingum um ökutæki án skráningarnúmers sem staðið hafa óhreyfð í lengri tíma í gegnum ábendingagátt bæjarins.
