Gömlu hesthúsin, Hlíðarendi, við Kaldárselsveg eiga að víkja vegna lagningar Ásvallabrautar, frá Skarðshlíð og yfir á Kaldárselsveg. Þegar hefur eitt húsanna verið rifið þegar Ásland 3 hverfið var byggt. Var krafa bæjaryfirvalda í samræmi við upphaflega samninga um að eigendur eigi að að fjarlægja húsin á eigin kostnað en húsin eru í mjög slæmu ástandi.
Lögmaður eigenda bendir á að árið 2006 hafi Hafnarfjarðarbær greitt fyrir það hesthús sem þá var fjarlægt 13,2 milljónir kr. fyri 162 fermetra hús. Segir lögmaðurinn að meðalhófs- og jafnræðisreglum sé vikið til hliðar þegar bótakröfum sé hafnað nú.
Skýr ákvæði í samningi frá 1967
Í þinglýstu skjali frá 20. júni 1967 kemur að bæjarsjóði sé, hvenær sem er, heimilt að taka landið til sín án endurgjalds fyrir mannvirki sem á því standa eða ræktun þess.
Bæjarráð birtir ekki hver lúkning á málinu sé en gera má ráð fyrir að gengið sé að hluta eða öllu að kröfum eigenda húsanna þrátt fyrir ákvæði í samningnum frá 1967 og mistök sem margir telja að hafi verið gerð 2006 séu endurtekin nú og háar upphæðir úr sameiginlegum sjóðum bæjarbúa séu greiddar andstætt við ákvæði samninga.
Kaldárselsvegur 121309, Hlíðarendi, niðurrif hesthúsa
Ef skoðaðar eru fundargerðir bæjarráðs sést að málið hefur verið tekið fyrir tíu sinnum en hvergi er að finna neinar upplýsingar um kröfur eigenda eða afstöðu bæjarins. Heldur er ekki birtur samningur sem upphaflega var gerður 1967 um hesthúsin þar sem voru ákvæði um að þau skyldu fjarlægð á kostnað eigenda við breytt skipulag enda var þessum húsum aldrei æltað að standa þarna til langframa.
Eru fundargerðir bæjarráðs í þessu máli í raun gagnslausar og óljóst hvernig hægt er að nota þær til nokkurs.
4.6.2020: Farið yfir stöðu málsins. Bæjarráð samþykkir lúkningu málsins í samræmi við vinnuskjal bæjarráðs. Bæjarstjóra falið að ganga frá málinu.
26.3.2020: Lagt fram bréf frá lögmanni hesthúsaeigenda. Ívar Bragason lögmaður á stjórnsýslusviði mætir til fundarins. Bæjarlögmanni falið að svara bréfi lögmanns hesthúsaeigenda.
27.2.2020: Farið yfir stöðu málsins. Ívar Bragason lögmaður á stjórnsýslusviði mætir til fundarins. Farið yfir málið.
13.2.2020: Farið yfir stöðu málsins. Lagt fram til kynningar.
30.1.2020: Farið yfir stöðu málsins. Ívar Bragason lögmaður á stjórnsýslusviði mætir til fundarins. Bæjarstjóra er falið að vinna málið áfram í samræmi við umræður á fundinum.
16.1.2020: Farið yfir stöðu málsins. Ívar Bragason lögmaður á stjórnsýslusviði mætir til fundarins. Farið yfir stöðu málsins.
29.8.2019: Áheyrnafulltrúi Miðflokksins, Sigurður Þórður Ragnarsson, leggur fram svohljóðandi fyrirspurn: Geta notendur hesthúsanna fengið að vera með hross í húsunum þar til Ásvallabraut verður boðin út? Upplýst er að málið í heild sinni er í vinnslu hjá starfsmönnum sveitarfélagsins.
15.8.2019: Farið yfir stöðu málsins. Ívar Bragason lögmaður á stjórnsýslusviði mætir til fundarins.
30.8.2018: Farið yfir stöðu málsins. Farið yfir tilboð sem lögmaður eigendanna hefur lagt fram til grundvallar á samkomulagi í málinu. Bæjarráð hafnar tilboðinu og felur bæjarstjóra að halda áfram viðræðum við eigendur húsanna á grundvelli þeirrar tillögu um samkomulagsbætur sem sveitarfélagið hefur þegar kynnt eigendum. Bæjarráð samþykkir einnig að frestur um lok afnota af landinu, sem fram kom í tilkynningu til eigenda húsanna, verði framlengdur og færist frá 1. september nk. og verði 1. júní 2019.
17.5.2018: Farið yfir stöðu málsins. Sigurður Haraldsson sviðsstjóri mætti á fundinn. Bæjarstjóra falið að fara í viðræður við hesthúsaeigendur í samræmi við umræður á fundinum.
