Hafnarfjarðarbær, lögreglan á höfuðborgarsvæðinu og Neyðarlínan ohf. hafa gert með sér samkomulag um kaup, uppsetningu og rekstur á öryggismyndavélakerfi í sveitarfélaginu.
Kerfinu er einungis ætlað að þjóna þörfum lögreglu og annarra neyðaraðila og fer um notkun þess og aðgang að gögnum úr kerfinu samkvæmt reglum lögreglu og Persónuverndar.
Íbúar í Hafnarfirði hafa ítrekað lagt fram óskir um uppsetningu eftirlitsmyndavéla og töluverð umræða skapaðis um slíka vöktun og uppsetningu myndavéla í öryggisskyni meðal bæjaryfirvalda.
Í samráði við Hafnarfjarðarbæ og Neyðarlínu hefur lögreglan ákveðið staðsetningu vélanna.
Myndavélarnir í eigu Hafnarfjarðarbæjar
Hafnarfjarðarbær kaupir 20 myndavélarnar, sér um uppsetningu þeirra og telst eigandi vélanna. Farið verður í að setja þær upp eftir áramót eða eins og veður og aðstæður leyfa. Lögreglan á höfuðborgarsvæðinu útvegar búnað vegna móttöku á merkjum úr öryggismyndvélum og upptöku.
Vélarnar verða settar upp á Hlíðartorgi sem er á mótum Reykjanesbrautar, Lækjargötuog Hlíðarbergs og gatnamót Hjallabrautar, Reykjavíkurvegar og Hjallahrauns.
Neyðarlínan ber ábyrgð á öllum samskiptum og samningum við eigendur fasteigna vegna uppsetninga á myndavélum á svæðinu ásamt því að aðstoða við uppsetningu og viðhald á vélunum. Jafnframt ber Neyðarlína ábyrgð á flutningi merkis frá hnútpunkti myndavéla inn að endabúnaði lögreglu. Mjög strangar reglur gilda um hvað má gera við upptökur úr þessum vélum og þær má einungis afhenda lögreglu eða að fengnu samþykki Persónuverndar.
Lögreglan annast rafræna vöktun en hefur ekki beinan aðgang
Lögreglan hefur ekki beinan aðgang að efni úr öryggismyndavélum Hafnarfjarðarbæjar en getur fengið upptökur úr vélunum ef grunur er um slys eða meint afbrot. Í tilkynningu frá Hafnarfjarðarbæ kemur þó fram að lögreglan annist vörslu á upptökum samkvæmt gildandi reglum og fyrirmælum Persónuverndar, annist vöktun á myndefninu og taki ákvörðun um aðgang annarra neyðaraðila að myndefni í rauntíma.
