Sigurður Tryggvi Sigurðsson, fyrrverandi formaður Verkalýðsfélagsins Hlífar, er látinn. Hann lést á Landsspítalanum 21. janúar sl., 88 ára að aldri.
Sigurður fæddist 5. júlí 1931 í Hafnarfirði og bjó þar alla tíð. Hann var yngstur þriggja barna þeirra Sigurðar Tómasar Sigurðssonar og Guðrúnar Jónsdóttur. Hann ólst upp í Hafnarfirði og gekk þar í skóla, útskrifaðist úr Flensborgarskólanum 1949. Með skóla starfaði hann hjá Kaupfélagi Hafnfirðinga og sinnti ýmsum störfum til sjós og lands að námi loknu. Hann vann á Keflavíkurflugvelli 1951-1954 en sumarið 1972 réð hann sig til starfa hjá Íslenska álverinu í Straumsvík og vann þar til 1981.
Sigurður kynntist verkalýðsmálum strax sem unglingur en faðir hans var í stjórn Hlífar árin 1940-1950. Skömmu eftir að hann byrjaði hjá Ísal í Straumsvík var hann kosinn trúnaðarmaður starfsmanna og gegndi því starfi til 1979. Sigurður átti sæti í stjórn Hlífar frá 1973 til 1978. Árið 1981 var hann kjörinn varaformaður Hlífar og réðst til starfa hjá félaginu. Sigurður varð formaður Hlífar 1987 og gegndi því til ársins 2002. Eftir það starfaði hann í nokkur ár sem ritari Hlífar, eða til ársins 2008.
Sigurður var kjarnyrtur og lá ekki á skoðunum sínum. Hann var kvikur í fasi og oft harður í horn að taka en það var stutt í húmorinn og hláturinn.
Hlusta má hér á áhugavert viðtal Þorgríms Gestssonar við Sigurð frá 2007 og geymt er á Hljóðsafni Landsbókasafns Íslands.
Eftirlifandi börn Sigurðar eru Sigurður Tryggvi, fæddur 1957, Guðrún, fædd 1958, Kolbrún Dagbjört, fædd 1961, Berglind, fædd 1964, og tvíburarnir Edda Sif og Elfa Björk, fæddar 1969. Afa- og langafabörn Sigurðar eru orðin 22 talsins.
Útför Sigurðar verður frá Hafnarfjarðarkirkju fimmtudaginn 30. janúar kl. 13.
