Sigurjón Ingvason og Rannveig Guðlaugsdóttir kærðu 19. júní 2107 og 1. maí 2018 breytingu á deiliskipulagi lóðarinnar Fornubúðir 5 og samþykkt byggingaráforma á sömu lóð frá 27. mars 2018 til úrskurðarnefndar umhverfis- og auðlindamála.
Deiliskipulagsbreyting lóðarinnar að Fornubúðum 5 var samþykkt í bæjarstjórn 27. apríl 2017. Með úrskurði ÚUA þann 12. júlí s.l. var samþykkt bæjarstjórnar Hafnarfjarðar á deiliskipulagi Suðurhafnar vegna Fornubúða 5 felld úr gildi. Jafnframt var samþykkt byggingarfulltrúans í Hafnarfirði frá 27. mars s.l. á umsókn um byggingu skrifstofu- og rannsóknarhúss sem tengist sjávarútvegi felld úr gildi.
Ekki í samræmi við aðalskipulag
Í úrskurði Úrskurðarnefndar umhverfis- og auðlindamála segir m.a.:
„Samkvæmt umræddri deiliskipulagsbreytingu er heimilt að reisa á fyrrgreindri lóð skrifstofu- og þjónustuhús og fram kemur í hinu kærða byggingarleyfi að húsnæðið sé ætlað undir starfsemi Hafrannsóknarstofnunar. Sú notkun getur ekki fallið undir landnotkunarflokk hafna eins og hann er skilgreindur í skipulagsreglugerð eða fyrrgreinda skilmála aðalskipulags. Í kafla skipulagsreglugerðar um landnotkun er gert ráð fyrir að þjónustustofnanir falli undir landnotkunarflokkinn samfélagsþjónusta (S) eða eftir atvikun miðsvæði (M) skv. grein 6.2 skipulagsreglugerðar.
Með vísan til þess sem að framan er rakið liggur fyrir að hin kærða deiliskipulagsbreyting er hvorki í samræmi við landnotkunarflokk svæðisins samkvæmt skipulagsreglugerð né skilmála Aðalskipulags Hafnarfjarðar 2013-2025. Verður því ekki hjá því komist að ógilda deiliskipulagsbreytinguna með hliðsjón af kröfu 7. mgr. 12. gr. skipulagslaga um innbyrðis samræmi skipulagsáætlana.
Að framangreindri niðurstöðu fenginni á hið kærða byggingarleyfi ekki stoð í gildandi deiliskipulagi svo sem áskilið er í 11. gr. laga um mannvirki nr. 160/2010 og verður það því fellt úr gildi.“
Úrskurðinn má lesa í heild sinni hér.
Skipulagslýsing auglýst og ný skipulagstillaga samþykkt
Í framhaldi af þessum úrskurði samþykkti skipulags- og byggingarráð á fundi sínum 20. júlí sl. að leggja fram deiliskipulagslýsingu þar sem tekin er saman lýsing á skipulagsverkefninu. Athugasemdafrestur var til 12. ágúst. Lýsingin var þó ekki birt í fundargerð ráðsins en birtist í fundargerð bæjarráðs 8. ágúst sl.
Á fundi skipulags- og byggingarráðs sl. þriðjudag, 14. ágúst, var lögð fram tillaga að breytingu á aðalskipulagi Suðurhafnar þar sem eftirfarandi ákvæði er sett inn fyrir allt svæðið: „Á hafnarsvæðum (H) er einnig gert ráð fyrir öðrum fyrirtækjum og stofnunum, sem tengjast höfn, útgerð, hafrannsóknum og öryggismálum sjófarenda. Nánari ákvæði um starfsemi verða sett í deiliskipulag viðkomandi svæða og reita/lóða.“
Þá samþykkti ráðið tillögu að deiliskipulagi sem er nær óbreytt fyrra deiliskipulagi sem fellt var úr gild nema að nú er vísað í nýtt aðalskipulag.
Hvað tekur við?
Reikna má með að bæjarstjórn afgreiði málið á fundi sínum 22. ágúst nk. og þá fari breytingatillögurnar í lögformlegt ferli í samræmi við 31. gr. skipulagslaga 123/2010 vegna breytinga á aðalskipulagi og í samræmi við 41. gr. skipulagslaga 123/2010 vegna breytinga á deiliskipulagi.
Skipulagslýsingin var auglýst 3. ágúst sl. en þar kom ekkert fram um það hvaða breytingar væri stefnt að, en vísað í lýsinguna mætti nálgast á hafnarfjordur.is og að skriflegar athugasemdir skyldu sendast á netfang bæjarins eigi síðar en 12. ágúst sl.
Í skipulagslýsingunni segir annars að verkferlarnir séu eftirfarandi:
• Lýsing aðalskipulagsbreytingar
– Auglýsing og kynning
– Lýsing send umsagnaraðilum
– Kynningarfundur
• Drög að breyttu aðalskipulagi kynnt sbr. 30. gr. skipulagslaga
• Gengið frá breytingartillögu
Hefði mátt komast hjá þessum töfum
Fulltrúi Samfylkingarinnar sagði m.a. í bókun sinni að niðurstaða úrskurðarnefndarinnar væri í samræmi við bókun bæjarfulltrúa Vinstri grænna og Samfylkingarinnar um deiliskipulagsbreytiginguna fyrir lóðina á bæjarstjórnarfundi 27. apríl, 2017. Þar sé m.a. bent á að ef á að blanda hafnarstarfsemi við aðra starfsemi og íbúðabyggð ber að gera það með heildstæðum hætti og vanda til verka, ekki með einstaka deiluskipulagsbreytingum eftir óskum eigenda lóða á hafnarsvæðinu.
Þá hafi verið bent á að viðbyggingin væri ekki í samræmi við lýsingu sem bæjarstjórn Hafnarfjarðar hafi samþykkt vegna fyrirhugaðrar breytinga á deiluskipulagi Flensborgarhafnar, en þar komi fram að þarna eiga að vera lágreistar byggingar, sem falli að aðliggjandi byggð.
Segir í bókuninni að ef farið hefði verið eftir þessum ábendingum, þá hefði mátt komast hjá stöðvun framkvæmda og spara dýrmætan tíma.
