Alls eru 469 nemendur úr grunnskólum Hafnarfjarðar við nám í Tónlistarskólanum í Hafnarfirði sem er 11,6% grunnskólanemenda.
Lægst er hlutfallið í Skarðshlíðarskóla, Hraunvallaskóla og Hvaleyrarskóla þar sem hlutfallið er 6 og 8% en hæst er það í Setbergsskóla þar sem 18% nemenda er í Tónlistarskólanum.
Alls eru 219 á biðlista eftir námi við skólann, þar af 131 úr grunnskólum Hafnarfjarðar.
Flestir eða 114 vilja komast í píanónám en 41 vill komst í gítarnám.
Skólinn hefur nú fengið aðstöðu í Skarðshlíðarskóla þar sem aðstaða er mjög góð, 6 stórar stofur, þar af ein hópkennslustofa og möguleiki á nýtingu á sal. Aðeins 13 nemendur skólans eru í Tónlistarskólanum en vonast er til að nemendum fjölgi þar á næstu árum. Tekist hefur að flytja eitthvað af kennslu út í Skarðshlíðarskóla en skólastjórnendur Tónlistarskólans miða við að þegar nemendur sæki tónlistartíma á skólatíma grunnskólans megi áætla að nemendafjöldi verði að lámarki 20% af heildarfjölda grunnskólanema en sú tala hefur farið í 50% úti á landsbyggðinni.
Í dag fer aðalkennsla fram í húsnæði skólans við Strandgötu en einnig er kennt í Tónkvísl, gamla leikfimi- og handavinnuhúsinu við Skólabrú auk þess sem lítillega er kennt í einstaka grunnskólum.
Þetta kemur fram í minnisblaði sem lagt var fram í fræðsluráði Hafnarfjarðar í gær.
Framtíðarsýn skólastjórnenda:
- Við gerum okkur grein fyrir að fjárhagsstaða Hafnarfjarðar er erfið um þessar mundir og erfitt verður að sækja aukningu á kennslutímum. Með tilkomu aðstöðunnar í Skarðshlíðarskóla munu örugglega fleiri nemendur óska eftir námi í skólanum. Aukning hljóðfærakennslu inni í grunnskólum leiðir af sér aukinn áhuga á tónlistarnámi og meiri sýnileika skólans, sem áætlaður er, bætir á biðlistann. Að okkar mati væri best að gera áætlun um fjölgun nemenda og vinna þetta í rólegheitum fram í tímann.
- Það er tímaskekkja í því að hafa rytmíska og „klassíska“ deildir aðskildar. Starfið yrði fjöbreyttara og nútímalegra ef hægt væri að koma viðbyggingu í Strandgötu á blað.
- Í vetur var ráðinn „músikþerapisti“ við skólann í 25% starf og sinnir hann nemendum með sérþarfir auk þess að vera ráðgjafi fyrir kennara en ískólanum eru margir nemendur sem þurfa sérstaka kennsluaðferðir. Við sjáum fyrir okkur að geta með þessu gert öllum nemendum kleift að stunda tónlistarnám.
- Sá hópur sem veit ekki af skólanum eða hvað þar fer fram eru nýbúar af erlendu bergi broti. Þetta er stór hópur og mjög lítill hópur þeirra er í skólanum. Möguleiki að ná til þeirra er t.d. auglýsa líka á ensku og pólsku þegar innritun hefst að vori og jafnvel bjóða upp á kynningu á starfi skólans á þeirra tungumáli.
- Það sem er skemmtilegt við tónlistarkennara er fjölbreytileikinn. Menntun og reynsla þeirra er ólík. Margir koma úr háskólum í Evrópu eða Norður Ameríku. Hafa jafnvel starfa erlendis eftir nám og koma svo með hugmyndir og nýjungar inn í okkar skóla sem við reynum að fanga og framkvæma ef okkur líkar hugmyndin. Tónfræðakennslan er gott dæmi um slíkt.
- Í vetur er áætlað að bjóða upp á tónlistarnámskeið fyrir börn yngri en 1. árs og ef vel gengur verða námskeiðin fleiri og jafnvel einnig fyrir eldri ungbörn.
- Einn kennari hefur sýnt áhuga á að bjóða upp á tónlistartíma fyrir eldri borgara og sjáum við þar möguleika á að nýta húsnæði skólans á morgnana.
