Fræðsluráð Hafnarfjarðar setti á fundi sínum í gær af stað vinna við að útfæra breytingu á opnun leikskóla Hafnarfjarðar frá sumrinu 2021.
Samþykktin felur í sér þá breytingu að frá og með sumrinu 2021 munu foreldrar geta valið hvenær barn þeirra taki sumarfrí á tímabilinu júní-ágúst. Börn munu líkt og áður þurfa að taka samfleytt sumarfrí í 4 vikur á umræddu tímabili.
Könnun var gerð á síðasta ári þar sem kannaður var vilji foreldra til þess að hafa val. 80% foreldra kusu að geta valið þann mánuð sem barn þeirra tæki frí. Jafnframt var gerð könnun meðal starfsfólks og var niðurstaðan sú að 44% starfsmanna vildu taka frí í öðrum mánuðum en júlí eins og verið hefur. Fulltrúi Samfylkingarinnar benti hins vegar á að í könnun sem gerð var vorið 2019 um hug starfsfólks og foreldra hafi einungis 19% þeirra starfsmanna sem svöruðu viljað breytt fyrirkomulag á sumarlokunum leikskólanna.
Settur verður af stað starfshópur til að útfæra samþykktin. Tillaga að erindisbréfi hópsins verður lagt fram á næsta fundi fræðsluráðs.
Fulltrúar Sjálfstæðisflokksins og Framsóknar og Óháðra samþykktu breytinguna en fulltrúar Samfylkingar og Miðflokks sátu hjá.
Fulltrúi Samfylkingarinnar lagði fram eftirfarandi bókun:
„Fulltrúi Samfylkingar telur að ekki sé tímabært að taka ákvörðun sem þessa eins og staðan er með mönnun leikskóla, stöðu kjaraviðræðna ofl.. Niðurstöður könnunar sem framkvæmd var vorið 2019 um hug starfsfólks og foreldra sýndi að einungis 19% þeirra starfsmanna sem svöruðu vildu breytt fyrirkomulag varðandi sumarlokanir leikskólanna. Eins er mjög mikilvægt að huga að faglegu starfi leikskóla í ákvörðunum sem þessum og telur fulltrúi Samfylkingar að meira samráð þyrfti að vera við starfsfólk og stjórnendur við þessa ákvörðun til að tryggja þá þætti. Ákvörðun um að skipa starfshóp í kjölfar þess að búið er að ákveða að breyta sumaropnun leikskólanna er ekki næg samvinna að mati fulltrúans og telur hann að betur hefði farið á því að láta starfshópinn vinna sína vinnu og taka svo ákvörðun í kjölfarið.“
Fulltrúi Miðflokksins lagði fram eftirfarandi bókun:
„Mikilvægt er að breytingar sem þessar verði unnar í góðri sátt við starfsmenn leikskóla, foreldra og fagaðila sem best þekkja til starfsemi leikskólanna. Lagt er til að kostnaður við þessar tillögur verði kostnaðarmetnar og afgreiðslu á málinu frestað meðan lausna er leitað í sátt við leikskólastarfsmenn og foreldra.“
Áheyrnarfulltrúi Viðreisnar lagði fram eftirfarandi bókun:
„Áheyrnarfulltrúi Viðreisnar í Fræðsluráði styður samþykkt meirihlutans og fagnar því að hlusta eigi á sjónarmið foreldra leikskólabarna í Hafnarfirði um aukin sveigjanleika í skipulagi sumarleyfa. Fulltrúinn vill koma á framfæri því sjónarmiði að gera þessa breytingu í eins góðu samstarfi og samtali við starfsfólk leikskólana og mögulega hægt er og tryggja þannig hagsmuni allra hluteigandi, barna, foreldra og starfsfólks leikskólanna.“
