Dagurinn 8. nóvember ár hvert er helgaður baráttunni gegn einelti í skólum. Á þessum degi eru jákvæð samskipti í fyrirrúmi og var skólasamfélagið hvatt til að taka höndum saman gegn einelti og var það víða gert.
Hvatningarverðlaun veitt í Öldutúnsskóla
Vinaliðaverkefnið hlaut sl. fimmtudag hvatningarverðlaun dags gegn einelti 2018. Lilja Alfreðsdóttir mennta- og menningarmálaráðherra afhenti forsvarsfólki verkefnisins, Guðjóni Erni Jóhannssyni og Selmu Barðdal Reynisdóttur viðurkenninguna við athöfn í Öldutúnsskóla.
„Vinaliðaverkefnið hefur reynst vel í fjölmörgum íslenskum skólum sem forvarnarverkefni er hvetur nemendur til virkrar þátttöku í frímínútum. Við vitum hversu dýrmætt það er að nemendum líði vel í skólanum – ég tel að það sé augljós fylgni milli þess að líða vel og ganga vel. Ég vil óska aðstandendum verkefnisins og öllum vinaliðum landsins til hamingju með þessa viðurkenningu og þakka fyrir þeirra góða starf,“ sagði Lilja Alfreðsdóttir mennta- og menningarmálaráðherra.
Vinaliðar
Vinaliðaverkefnið hefur verið innleitt í 46 íslenskum skólum en það er norskt að uppruna. Vinaliðar eru nemendur í 4. til 6. bekk sem veljast til þess að skipuleggja, taka þátt og aðstoða samnemendur sína við afþreyingu og leiki í frímínútum. Þeir gæta þess að engir nemendur séu einir eða út undan í frímínútum og láta vita ef þau verða vitni að einelti eða útilokun. Í verkefninu fá vinaliðar einnig stuðning og leiðsögn til þess að sinna hlutverki sínu sem best.
Verkefnið hefur verið innleitt m.a. í Hraunvallaskóla og Hvaleyrarskóla.
Öflug forvörn gegn einelti er að veita börnum skipulega þjálfun í að vera saman í leik og starfi þar sem lýðræði, mannréttindi og jafnrétti er haft að leiðarljósi. Þessi færni er liður í því að gera umhverfið jákvæðara þar sem einelti nær síður að skjóta rótum.
Athöfnin í Öldutúnsskóla var hin hátíðlegasta þar sem Kór Öldutúnsskóla vakti sérstaka lukku með Söng jarðarinnar auk þess sem Svavar Knútur söng og fékk aðra til að syngja með.
