Umhverfis- og framkvæmdaráð hefur tekið jákvætt í erindi um að nýr frisbígolfvöllur eða folfvöllur, verðir gerður í landi Áss við Ástjörn og og hefur vísað erindinu til umsagnar á umhverfis- og skipulagssviði og kynningar íbúa.
Fyrirhugað var að golfvöllurinn yrði í hlíðum Selhöfða við Hvaleyrarvatn en vegna mikillar andstöðu Skógræktarfélags Hafnarfjarðar var horfið frá þeirri staðsetningu. Taldi félagið að fella þyrfti of mörg tré og að íþróttin ylli töluverðum skemmdum á trjám.
Svæðið við Ástjörn er talið henta vel, þar er aflögð gróðrarstöð og mikill trjágróður með opnum svæðum á milli.
Frisbígolfsamband Íslands í samvinnu við Frísbígolffélag Hafnarfjarðar hafa komist að samkomulagi við Hafnarfjarðarbæ um uppbyggingu á 18 brauta keppnisvelli og voru drög að samstarfsamningi við Frisbígolffélag Hafnarfjarðar lögð fram til kynningar á fundi fræðsluráðs í gær, 17. apríl.
Nánar má fræðast um Frisbígolffélag Hafnarfjarðar hér.
